Tags-Phool

roz puujā ke liye phuul sajātā hai 'salām'
jaane kab us kā ḳhudā sū-e-zamīñ aa.egā

umr inhī ke saath guzārī hai jānāñ
zaḳhm mujhe lagte haiñ phuul gulāboñ ke

sho.ala ho ki ḳhushbū ho tāsīr meñ yaksāñ hai
har sham.a mahaktī hai har phuul farozāñ hai

shagufta phuul pareshāñ huā to ġham na karo
ki vo to yuuñ bhī havā meñ bikharne vaalā thā

kaun vīrāne meñ dekhegā bahār
phuul jañgal meñ khile kin ke liye

sahn-e-gulshan meñ mire phuul kareñge gulchīñ
ro.egā suunā qafas dekh ke sayyād mujhe

maiñ phuul chuntī rahī aur mujhe ḳhabar na huī
vo shaḳhs aa ke mire shahr se chalā bhī gayā

sair ko aate haiñ gulshan meñ raqīboñ kī tarah
phuul saare vo gulistāñ ke masal jaate haiñ

koī mujh pe phuul chaḌhā.e kyuuñ koī mujh pe sham.a jalā.e kyuuñ
koī mere paas bhī aa.e kyuuñ ki maiñ hasratoñ kā mazār huuñ

nā-gahāñ magar is meñ phuul kyuuñ nahīñ khilte
reg-zār kī mānind ḳhāk-e-dil bhī taptī hai

har ḳhaar ke siine meñ chaman ham ne khilā.e
har phuul ko firdaus-e-nazar ham ne banāyā

ye aarzū ke sitāre ye intizār ke phuul
chamak rahī haiñ ḳhatā.eñ mahak rahe haiñ gunāh

ham phuul haiñ ḳhushbū hī sadā deñge jahāñ ko
hargiz na kabhī kāñTā kahīñ ban ke chubheñge

sukūt-e-shahr-e-suḳhan meñ vo phuul sā lahja
samā.atoñ kī fazā ḳhvāb ḳhvāb kar degā

sab raushnī ke phuul to khilte hī bujh ga.e
kaḌvā dhuāñ ab āñkhoñ se ro ro nikāliye

dīvār par khile haiñ na.e mausamoñ ke phuul
saaya zamīn par kisī pichhle makāñ kā hai

phuul kar le nibāh kāñToñ se
aadmī hī na aadmī se mile

siyāh darzoñ meñ ghaas ke zard nīm-jāñ phuul hañs rahe haiñ
maiñ apnī vīrāñ ḳhizāñ-zada zindagī se begāna ho gayā huuñ

har-sū ḳhushbū ko fazāoñ meñ bikhartā dekhūñ
jab kisī shāḳh pe ik phuul ko martā dekhūñ

be tire yaar sair-e-gulshan meñ
phuul āñkhoñ meñ ḳhaar sā khaTkā