Tags-Phool

marhale aise bhī aksar aa.e
phuul barsā.e to patthar aa.e

pahle ik jism banātā huuñ kisī phuul pe phir
ek chehrā kisī patthar pe banā detā huuñ

sunā hai phuul jhaḌe the jahāñ tire lab se
vahāñ bahār utartī hai roz shaam ke saath

lahū deñge to leñge pyaar motī ham nahīñ leñge
hameñ phūloñ ke badle phuul do shabnam nahīñ leñge

dil ke vīrāne meñ kis yaad kā jhoñkā guzrā
kis ne is ret meñ ye phuul se mahkā.e haiñ

husn-e-sad-rañg se firdaus ba-dāmāñ niklā
ham ne jis phuul ko dekhā vo gulistāñ niklā

mire saath saath safar meñ hai mire ghar kī saarī hamāhamī
sar-e-gosh qahqahe ras-bhare sar-e-dosh phuul gulāb kā

baat jab hai ki har ik phuul ko yaksāñ samjho
sab kā āmeza vahī aab vahī gil bhī vahī

is vīrāne meñ bhī khulte pag pag ram ke phuul
dil se kabhī go kar bhī guzartī ḳhush-raftār havā

dil ke kyā kyā taur the lekin
phuul thā ik murjhāne vaalā

ye sochte hī mire hāth-pāoñ phuul ga.e
mirā nishān kahānī meñ kab kahāñ khulegā

vo jin ke lams se tū khil ke phuul bantā thā
vo ab bhaTakte haiñ dar par tire sabā ban kar

reñgne kī bhī ijāzat nahīñ ham ko varna
ham jidhar jaate na.e phuul khilāte jaate

aag hai ki paanī hai
phuul hai ki chehra hai

sajī hai bazm-e-shabnam to tabassum kaam aa.egā
ta.āruf phuul kā darpesh hai to chashm-e-tar le jā

phuul murjhā ga.e gulistāñ ke
kaisā jhoñkā chalā nahīñ ma.alūm

zarā sā phuul mere baaġh meñ hai
bahut kuchh māvarā rakkhā hai us ne

chāñd kī dhīmī dhīmī chaap ubharte hī
saare sapne phuul pahan kar aate the

shā.erī phuul khilāne ke sivā kuchh bhī nahīñ hai to 'zafar'
baaġh hī koī lagātā ki jahāñ khelte bachche jā kar

vafā ke phuul tab samjho khileñge
jo aa.egā koī kāñToñ pe chal ke