Tags-Phool

vo phuul chaḌhāte haiñ dabī jaatī hai turbat
ma.ashūq ke thoḌe se bhī ehsān bahut haiñ

maiñ ne jab jab bhī tirā naam likhā kāġhaz par
yuuñ lagā jaise koī phuul khilā kāġhaz par

koī hasrat na gulchīñ ke dil meñ rahī
phuul murjhā ga.e gulistāñ luT gayā

lahū meñ Duubā huā milā hai vafā kā har ik usuul tujh ko
maiñ jāntā huuñ pasand kyuuñ haiñ gulāb ke surḳh phuul tujh ko

chunñe na diyā ek mujhe laakh jhaḌe phuul
allāh kare ḳhāna-e-gul-chīñ meñ paḌe phuul

sarsoñ bhī nahīñ phūltī āñkhoñ meñ hamārī
jab tak ki chaḌhā jaa.eñ na do-chār ghaḌe phuul

kis din na khiñche āh-e-sharar-bār kī talvār
kasarāt na maiñ ne sipar-e-mah meñ jaḌe phuul

kuchh bhī hai jinheñ azm vahī sadr-nashīñ haiñ
hote haiñ gul-rū-e-sabad sab se baḌe phuul

fariyād kar us dard se ai murġh-e-gulistāñ
kāñTe kī sināñ bāñdh ke gulchīñ se laḌe phuul

dāġhoñ ke hī qābil the ham is baaġh meñ ai 'bahr'
gulchīn-e-muqaddar ne diye haiñ ye saḌe phuul

vo murġh-e-chaman haiñ ki bahār apnī ḳhizāñ hai
kaliyā.e par-o-bāl jab apne to jhaḌe phuul

rāñgā ho agar dast-baranjan to hai chāñdī
vo gul jo na pahne to haiñ sone ke kaḌe phuul

ham zaḳhmiyoñ ko chāñdnī kī taab nahīñ hai
sahte haiñ kaḌī dhuup nihāyat haiñ kaḌe phuul

jā jā ke bahut zulf ke kūche meñ aḌe phuul
lekin na kabhī kaan ke patte se laḌe phuul

taqdīr meñ zillat thī gul-rū-e-sanam se
thāloñ ne bahut gor jhañkā.e na gaḌe phuul

kyā sabza-e-ruḳhsār se nisbat hai chaman ko
kāñTe ye vo haiñ jin kī haiñ palle meñ dhaḌe phuul

ham-palla hue us se na chhoTe na baḌe phuul
āñkhoñ meñ tulā yaar tarāzū meñ paḌe phuul

raushan-suḳhanī ḳhatm hai us ġhuncha-dahan par
hath-phūl ke muñh se kabhī aise na jhaḌe phuul

kyā jurm hai kis bulbul-e-shaidā ko jalāyā
kyuuñ chār-pahar dhuup meñ hote haiñ khaḌe phuul

faqat salām hī likhtā thā peḌ ko ḳhat meñ
maiñ aaj ḳhush huuñ bahut phuul ko duā likh kar