Tags-Phool

har ik kalī ne oḌh liyā mātamī libās
har phuul par malāl hai aur chāñd-rāt hai

phuul bantī hai kalī hañste-hañsāte lekin
us ke dil pe jo guzartī hai vahī jāntī hai

nihāl-e-vasl nahīñ sañg-bār karne ko
bas ek phuul hai kaafī bahār karne ko

tire kūche meñ sub.h-dam aksar
dekh kar phuul ham ko sharmā.e

mere ḳhvāboñ ko hai mausam pe bharosa kitnā
ba.ad meñ phuul khileñ haar piro luuñ pahle

har din jis par phuul khileñ vo be-mausam kī Daal nahīñ maiñ
saaje na saaje har kañdhe par paḌne vaalī shaal nahīñ maiñ

ye duniyā bāġh-e-zebā hai magar chashm-e-tamāshā meñ
sar-e-shāḳh-e-tamannā phuul bhī do-chār hote haiñ

jhunD meñ lauTne lagte haiñ sunahre panchhī
sūkhtī shāḳhoñ pe jab phuul khilātī hai havā

shāh-zādī tirī āñkhoñ meñ ye dahshat kaisī
phuul haiñ haath meñ talvār nahīñ hai koī

phuul se rañg judā honā koī khel nahīñ
apnī miTTī ko kahīñ chhoḌ ke jaa.eñ kaise

phuul hī phuul haiñ tā-hadd-e-nazar phuul hī phuul
is ḳharābe ke liye yaad kiyā hai maiñ ne

tez ho jaatā hai ḳhushbū kā safar shaam ke baad
phuul shahroñ meñ bhī khilte haiñ magar shaam ke baad

jaan lene ke tarīqe kis qadar dilchasp haiñ
zahr barsātī hai shabnam phuul barsātī hai aag

jab bhī lauTe pyaar se lauTe phuul na pā kar gulshan meñ
bhañvre amrit ras kī dhun meñ pal pal sau sau baar ga.e

kāñToñ ke dukh sahne meñ taskīn bhī thī ārām bhī thā
hañsne vaale bhole-bhāle phuul chaman ke maar ga.e

ham-safīro kabhī miTtī hai tamannā-e-bahār
ye kisī phuul kisī sho.ale meñ Dhal jā.egī

jahāñ dekhūñ vahāñ bas ek hī ātish-zabānī hai
baraste phuul hoñ jin se koī aisā nahīñ dekhā

subūt-e-sañg-dilī is se baḌh ke kyā hogā
jo phuul pheñkā mirī samt ban gayā patthar

phuul ḳhushbū un pe uḌtī titliyoñ kī ḳhair ho
sab ke āñgan meñ chahaktī beTiyoñ kī ḳhair ho

vo jo niklā sub.h jaise āftāb
rashk se gul phuul murjhā.e bahut