Tags-Phool

pūchhtī phir rahī hai os abhī
phuul kab pairahan badaltā hai

na koī phuul hī rakhā na aarzū na charāġh
tamām ghar ko bayābān kar diyā maiñ ne

zamīñ pe bahtī huī ye āñkheñ falak pe rukte hue ye taare
sunā hai ye phuul haiñ usī ke sunā hai ye aabjū vahī hai

phuul se zaḳhmoñ kā ambār sambhāle hue haiñ
ġham kī pūñjī mire ash.ār sambhāle hue haiñ

sūraj haiñ kabhī chāñd kabhī sham.a kabhī phuul
kis roz na.e ruup vo badlā nahīñ karte

phuul ik dar pe us ke chhoḌ aayā
maiñ ne dānista muḳhbirī ke liye

phuul sheroñ kī ravānī meñ chale talvār bhī
bāñsurī kī taan meñ hai nīmche kī dhaar bhī

jin kī ḳhushbū chhed rahī hai āñchal ko
kaise phuul vo Daal gayā hai jholī meñ

ġham-e-umr-e-muḳhtasar se abhī be-ḳhabar haiñ kaliyāñ
na chaman meñ pheñk denā kisī phuul ko masal kar

phuul bāhar hai ki andar hai mire siine meñ
chāñd raushan hai ki maiñ aap hī tābinda huuñ

vahī ilāj-e-shab-e-saḳhti-e-ḳhizāñ thā 'zafar'
jo ek phuul kisī nau-bahār ne na diyā

tum agar chāho to miTTī se abhī paidā hoñ phuul
maiñ agar māñgūñ to dariyā bhī na de paanī mujhe

mere gul ko lā yā apne phuul le jā andalīb
aise kāñToñ se nahīñ fāñseñ nikalvānī mujhe

ḳhushk miTTī meñ paḌā thā mire dil kā paudhā
is kī shāḳhoñ pe koī phuul bhī aatā kaise

phuul zaḳhmoñ ke yahāñ aur bhī chun luuñ lekin
apnā dāman maiñ karūñ aur kushāda kaise

dikhā.ī dene lagī thī ḳhushbū
maiñ phuul āñkhoñ pe mal rahā thā

dikhā.ī dene lagī thī ḳhushbū
maiñ phuul āñkhoñ pe mal rahā thā

ek laḌkī ne ā.īna dekhā
ā.īne meñ khile hue the phuul

ġhair aa.e ga.e phuul chune bū bhī uḌaa.ī
ham aise ki apnā hī gulistāñ nahīñ dekhā

shāḳh se kaTne kā ġham un ko bahut thā lekin
phuul majbūr the hañste rahe gul-dānoñ meñ