Tags-Phool

koī mausam ho mirī ḳhushbū rahe is phuul meñ
dāstāñ merī kahī yā an-kahī jaisī bhī hai

ik aag sī lagā.ī hai Tesū ne phuul ke
kyā zard zard phuul khile haiñ babūl ke

sarsoñ ke lahlahāte haiñ khet is bahār meñ
nargis ke phuul phuul uThe lāla-zār meñ

patte jo zard zard haiñ sone ke paat haiñ
sadbarg se talā.ī kiran phuul maat haiñ

sarsoñ jo phuul uTThī hai chashm-e-qayās meñ
phūle-phale shāmil haiñ basantī libās meñ

pītāmbar nafīs kamar meñ kasā huā
ḳhushbū se haar phuul kī mandir basā huā

phuul na the ārā.ish thī us mast-adā kī aamad par
haath meñ Daalī Daalī ke ek halkā sā paimāna thā

kāñToñ pe chale haiñ to kahīñ phuul khile haiñ
phūloñ se mile haiñ to baḌī choT lagī hai

maiñ aksar sochtā huuñ phuul kab tak
sharīk-e-girya-e-shabnam na hoñge

ye kahnā masnad-e-shāḳh-e-numū pe thā jo kabhī
vo phuul sūrat-e-ḳhushbū bikhar gayā kahnā

qā.ede bāzār ke is baar ulTe ho ga.e
aap to aa.e nahīñ par phuul mahñge ho ga.e

har aadmī ko ḳhvāb dikhānā muhāl hai
sho.aloñ meñ jaise phuul khilānā muhāl hai

kuchh phuul haath par mire kuchh ḳhaar jism meñ
'saulat' ye kis bahār kā mausam rahā huuñ maiñ

barf ke phuul khile dhuup ke daane nikle
ab ke mausam meñ sabhī ḳhvāb suhāne nikle

tū ne kamāl jalva-e-jānāna kar diyā
bulbul ko phuul sham.a ko parvāna kar diyā

ThiThurte phuul pe tasvīr-e-rañg-o-bū kab tak
jhulastī shāḳh pe barg-e-hinā hai kitnī der

apne kamre kā koī gul-dān ḳhālī kyuuñ rahe
phuul kāġhaz ke sajā lo sūñgh kar dekhegā kaun

kaash tum samajh saktīñ zindagī meñ shā.er kī aise din bhī aate haiñ
jab usī ke parvarda chāñd us pe hañste haiñ phuul muskurāte haiñ

phuul ke chehre ye shabnam kaisī
āsmāñ raat meñ royā hogā

tujhe bhī de na sake chain vo gulāb ke phuul
mujhe bhī izn-e-tabassum bahār ne na diyā