Tags-Politics

lagtā hai ghul ga.ī hai siyāsat ḳhulūs meñ
apne hī dostoñ se harīfā.ī ho ga.ī

zabāñ merī siyāsat chāTtī hai
ki is kā zā.iqa shīr-o-shakar hai

jis ko ab bhī ho siyāsat pe yaqīn
us ko ye mulk dikhāyā jaa.e

ye ilm-o-fan kā gahvāra hai tahzībī idāra hai
nazar meñ ye hamārī to siyāsat kā akhāḌā hai

jin ko talāsh manzil-e-isnāniyat kī thī
gumrāh un ko ahl-e-siyāsat na kar sake

jānte to haiñ yahāñ sab hī siyāsat ke fareb
kyā ḳhabar kis maslahat se har zabāñ ḳhāmosh hai

ab ke bhī tere liye jaañ se guzar jā.eñge ham
ham ne pahle bhī mohabbat meñ siyāsat nahīñ kī

jazba-e-maz.hab siyāsat kā ḳharosh
ilm kī jehd-e-musalsal fan kā josh

shā.era bhī thī ḳhatība bhī siyāsat-dāñ bhī thī
naujavānān-e-vatan kī tū chahetī maañ bhī thī

fasādoñ meñ jo shāmil haiñ vo mohre haiñ siyāsat ke
ḳhud apne aap koī bhī yahāñ dañgā nahīñ kartā

siyāsat ke agar bas meñ ho 'gauhar'
mohabbat par bhī vo jurmāna kar de

terī qudrat kī siyāsat na samajh meñ aa.ī
haram-o-dair ko har daur meñ yakjā dekhā

kī mohabbat to siyāsat kā chalan chhoḌ diyā
ham agar ishq na karte to hukūmat karte

siyāsat hai ye dil kī kyā ḳhabar ahl-e-siyāsat ko
ki kyūñ-kar parda-e-inkār meñ iqrār ho jaa.e

haa.e urdu ye siyāsat tirī jāgīr ke saath
koī 'ġhālib' kā taraf-dār koī 'mīr' ke saath

na siyāsat na ma.īshat na ba-nām-e-maz.hab
ab gavārā nahīñ pāband-e-salāsil honā

ye jabr-e-siyāsat ye insāñ mazlūm aaheñ majbūr fuġhāñ
zaḳhmoñ kī mahak dāġhoñ kā dhuāñ mat pūchh fazā-e-zindāñ meñ

bahisht-rañg murādoñ kī jā-namāzoñ par
munāfiqoñ kī siyāsat abhī na rakkhī jaa.e

siyāsat ke chehre pe raunaq nahīñ
ye aurat hamesha kī bīmār hai

abhī umīd-o-vafā na toḌo siyāsat-e-dilbarī na chhoḌo
kabhī jo firdaus-e-rañg-o-bū thā vo ek ujḌā dayār sā hai