Tags-Politics

maiñ pairvi-e-ahl-e-siyāsat nahīñ kartā
ik rāsta in sab se judā chāhiye mujh ko

nafrat kī hī ik fasl yahāñ phaltī hai
sach ye hai siyāsat hī hameñ chhaltī hai

adīboñ ko sach bolnā chāhiye
siyāsat kī āb-o-havā Thiik na.iiñ

ye jo behāl sā manzar ye jo bīmār se ham tum
siyāsat kī navāzish hai kisī se kuchh nahīñ boleñ

jab se dekhā hai tujhe mujh se hai merī an-ban
husn kā rañg-e-siyāsat mujhe ma.alūm na thā

maujoñ kī siyāsat se māyūs na ho 'fānī'
girdāb kī har tah meñ sāhil nazar aatā hai

kāñToñ se guzar jaatā huuñ dāman ko bachā kar
phūloñ kī siyāsat se maiñ begāna nahīñ huuñ

baḌī mushkil se sīkhā hai sabaq ham ne siyāsat kā
tujhe qadmoñ meñ rakhte haiñ sitāra ham nahīñ karte

ai daur-e-siyāsat ahd-e-zabūñ 'jarrār' se ye ummīd na rakh
us dar pe jhukā dī peshānī haath us ke aage joḌ diye

suḳhan ko siyāsat kā ziina dikhā kar
tamāsha ye ahl-e-qalam kar rahe haiñ

alag siyāsat-e-darbāñ se dil meñ hai ik baat
ye vaqt merī rasā.ī kā vaqt hai ki nahīñ

ye kaisī siyāsat hai mire mulk pe haavī
insān ko insāñ se judā dekh rahā huuñ

baḳhshī haiñ ham ko ishq ne vo jur.ateñ 'majāz'
Darte nahīñ siyāsat-e-ahl-e-jahāñ se ham

siyāsat naqlī noToñ kī tarah dhoke se chaltī hai
jise rahbar samajhte ho vo rahzan ho bhī saktā hai

dāl-roTī khā ke muflis kaaT lete the magar
ab siyāsat ne use bhī ḳhvāb jaisā kar diyā

amn-o-sulh-o-āshtī ho jaise bīmārī kā naam
hai siyāsat ahd-e-nau meñ ek ayyārī kā naam

ḳhabar uḌaao ki peshānī-e-siyāsat par
ham apne fāqoñ kī tafsīl likhne vaale haiñ

naġhma-o-sher-o-zabāñ ahl-e-siyāsat ke qatīl
puurī tahzīb ke miTne ke nishāñ dekhe haiñ

kāñToñ se guzar jaatā huuñ dāman ko bachā kar
phūloñ kī siyāsat se maiñ begāna nahīñ huuñ

visāl hijr siyāsat masā.il-e-duniyā
ġhazal meñ ham bhī ye kyā kyā ḳhayāl le aa.e