Tags-Poverty

maiñ ne jab vādī-e-ġhurbat meñ qadam rakkhā thā
duur tak yād-e-vatan aa.ī thī samjhāne ko

dekh kar haal hamārā na hañso ġhurbat meñ
kaun haiñ kis tarah aa.e haiñ tumheñ kyā ma.alūm

dil thā udaas ālam-e-ġhurbat kī shaam thī
kyā vaqt thā ki tum se mulāqāt ho ga.ī

ġhurbat meñ vatan aur ahl-e-vatan kī yaad jab aa jaatī hai mujhe
dil hai ki taḌaptā rahtā hai aur ashk bhī Dhalte rahte haiñ

ġhurbat kī sub.h meñ bhī nahīñ hai vo raushnī
jo raushnī ki shām-e-savād-e-vatan meñ thī

ye hai 'sīmāb' ik nā-gufta ba-afsāna kyā kahiye
vatan se kunj-e-ġhurbat meñ chale aane pe kyā guzrī

kunj-e-ġhurbat maiñ kabhī gosha-e-zindāñ meñ the ham
jān-e-jāñ jab bhī tire aane kā mausam aayā

maiñ aisā sar huuñ jo dasht-e-ġhurbat meñ kaT gayā thā
maiñ sar-burīda shahīd lāshoñ meñ rah chukā huuñ

ye shām-e-ġhurbat-e-dil hai yahāñ charāġh kahāñ
ḳhayāl-e-sub.h-e-vatan ke sivā kuchh aur nahīñ

jo ġhurbat meñ bhī dil ko de ra.īsī
maiñ muflis kā vahīñ ik hausla huuñ

fikr-e-ġhurbat hai na andesha-e-tanhā.ī hai
zindagī kitne havādis se guzar aa.ī hai

bhaTak rahā huuñ maiñ sadiyoñ se dasht-e-ġhurbat meñ
koī to mujh ko batā.e kahāñ mirā ghar hai

khul gayā na ho kisī aur taraf baab mirā
kahīñ āvāra-e-ġhurbat hī na ho ḳhvāb mirā

karte kis muñh se ho ġhurbat kī shikāyat 'ġhālib'
tum ko be-mehri-e-yārān-e-vatan yaad nahīñ

ġhurbat ke bayābāñ meñ hai 'mus.hafī' āvārā
ai ḳhizr-e-ḳhajista pe Tuk raah tū batlānā

dasht-e-ġhurbat meñ rāh-e-hastī meñ
maiñ samajhtā huuñ ham-safar ho tum

jis se raushan hai matl.a-e-ummīd
shām-e-ġhurbat meñ vo sahar ho tum

vādi-e-ġhurbat meñ yuuñ gum-karda manzil thā 'shakīl'
rahzan-e-manzil ko ḳhizr-e-kārvāñ samjhā thā maiñ

bagūle ab haiñ ki ġhurbat hai gor-e-shāhañ par
saroñ pe chatr jilau meñ kabhī sipāheñ thiiñ

chand zarre merī miTTī ke faqat haath aa.e
dasht-e-ġhurbat ke bagūloñ ne jo chakkar maarā