Tags-Poverty

ġhurbat kī ThanDī chhāñv meñ yaad aa.ī us kī dhuup
qadr-e-vatan huī hameñ tark-e-vatan ke baad

merī ġhurbat nahīñ khultī mujh par
log zardār samajhte haiñ mujhe

aise ġhurbat meñ baiThā huuñ jaise baḌā bār-e-sar rakh diyā
ek sehn ek dar ek dīvār kā naam ghar rakh diyā

ġhurbat meñ ajnabī kā bhī hotā hai ghar kahīñ
din-bhar kahīñ guzār diyā rāt-bhar kahīñ

yaad ġhurbat meñ jab aatī hai vatan kī mujh ko
nā-gahāñ aañkh mirī ashkoñ se tar hotī hai

is marīz-e-ġham-e-ġhurbat ko sambhālā de do
zehn-e-tārīk ko yādoñ kā ujālā de do

zamāne hamārā suḳhan paas rakh
tujhe aur ġhurbat meñ kyā deñge ham

dasht-e-ġhurbat hī pe mauqūf nahīñ hai 'tābish'
ab to ghar meñ bhī ġharīb-ul-vatanī hotī hai

merī ġhurbat ko sharāfat kā abhī naam na de
vaqt badlā to tirī raa.e badal jā.egī

myaañ ġhurbat meñ har ik be-sahārā chhoḌ jaatā hai
añdherā ho to saaya bhī hamārā chhoḌ jaatā hai

ġhurbat kī Thokaroñ meñ jo pal kar javāñ huā
tūfāñ ke rū-ba-rū vahī chaTTān bhī to hai

sab ne ġhurbat meñ mujh ko chhoḌ diyā
ik mirī bekasī nahīñ jaatī

rañj-e-ġhurbat meñ dekh kar mujh ko
dil-e-sahrā bhī baaġh baaġh huā

chauk meñ dekhne vaale the tamāsha us kā
jis ko ġhurbat meñ mayassar thā labāda aadhā

ain ġhurbat meñ nikhartā hai ḳhudī kā jauhar
naḳhl-e-ausāf lahū pī ke harā hotā hai

fasl-e-gul aa.ī yā ajal aa.ī kyuuñ dar-e-zindāñ khultā hai
kyā koī vahshī aur aa pahuñchā yā koī qaidī chhūT gayā

dasht-e-ġhurbat meñ buzurgoñ kī duā hai hamrāh
sāya-e-abr-e-ravāñ saath liye phirte haiñ

guzar hī jā.eñge ġhurbat ke din bhī
kareñ do din ko ab aḳhlāq kam kyā

ġhurbat ne mere shahr kā naqsha badal diyā
ġhairat ko zinda rahne kī chāhat nigal ga.ī

ġhurbat kā apne haal tujhe aur kyā kahūñ
ik din to ik faqīr bhī uTh kar chalā gayā