Tags-Poverty

pursāñ nahīñ ġhurbat meñ mirā koī bhī 'kashfī'
shāyad mujhe yārān-e-vatan bhuul ga.e haiñ

kareñ jo shikva zabāñ kahāñ hai zabāñ meñ tāb-e-fuġhāñ kahāñ hai
kahāñ kā pardes kaisī ġhurbat vatan kī galiyoñ meñ luT ga.e ham

'sarosh' vādī-e-ġhurbat se be-ḳhabar guzro
tumhāre saath mohabbat kā narm saaya hai

mujh se ġhurbat mol le kar kaun ghar le jā.egā
tum mujhe rusvā sar-e-bāzār-e-zar karte ho kyuuñ

benām-o-nishāñ rahnā ġhurbat ke ilāqe meñ
ye shahr bhī dilkash thā tab ham ko pasand aayā

dasht-e-ġhurbat meñ rulāte haiñ hameñ yaad aa kar
ai vatan tere gul o sumbul o raihāñ kyā kyā

muñh uThā.e jaate haiñ yuuñ dasht-e-ġhurbat meñ chale
nā-balad haiñ sab hī ham meñ rāh-dāñ koī nahīñ

rañj-e-ġhurbat ke sivā jabr ke pahlū bhī to haiñ
jo Tapakte nahīñ āñkhoñ se vo aañsū bhī to haiñ

jo ġhurbat ke añdheroñ meñ pale haiñ
na.ī tahzīb kā un par asar na.iiñ

muhīt-e-ġhurbat-e-bālīñ hai ḳhānumāñ-sozī
koī habīb nahīñ koī ġham-gusār nahīñ

ruḳhsat ai vahshat-e-tanhā.ī-o-ġhurbat ruḳhsat
ḳhauf hī kyā hai jo hamrāh mire dil hogā

suno ai yaaro ik ma.ashūq-e-harjā.ī ke jalve ne
phirāyā dar-ba-dar mere ta.iiñ ġhurbat se kah diijo

aarzū dost kī bekār hai ġhurbat meñ 'rashīd'
aap ko hālat-e-yārān-e-vatan yaad nahīñ

maiñ vo nākām musāfir huuñ jahāñ meñ jis ko
shām-e-ġhurbat ke sivā sub.h-e-vatan yaad nahīñ

eḌiyāñ vādi-e-ġhurbat meñ ragaḌte hī rahe
duur khiñchtī ga.ī manzil vatan-āvāroñ se

sab ne ġhurbat meñ mujh ko chhoḌ diyā
ik mirī bekasī nahīñ jaatī

mere ġhurbat ke dinoñ meñ hausla de jā.egā
dost mere tū ḳhushī kī ik sadā de jā.egā

DhūñDhne par bhī nishāñ miltā nahīñ
mar miTūñ kī shān-e-ġhurbat dekhnā

rakkhā nahīñ ġhurbat ne kisī ik kā bharam bhī
mai-ḳhāna bhī vīrāñ hai kalīsā bhī haram bhī