Tags-Poverty

rahā na shikva-e-be-chārgī ki ġhurbat meñ
qadam qadam pe sahāre ko be-kasī to milī

ajnabiyyat kā har ik ruḳh pe nishāñ hai yaaro
apne hī shahar meñ ġhurbat kā samāñ hai yaaro

duur hotī hai rah-e-ġhurbat meñ kosoñ kī thakan
jab kisī manzil pe koī ham-safar paatā huuñ maiñ

ḳhizāñ kī vādi-e-ġhurbat guzār leñ to 'shamīm'
mileñ dayār-e-bahārāñ ke kaj-kulāhoñ se

dhuup meñ jaltī haiñ ġhurbat vatanoñ kī lāsheñ
tere kūche meñ magar sāya-e-dīvār na thā

allāh re ḳhulūs ki manzil abhī hai duur
ġhurbat kī shaam aa ke milī mujh ġharīb se

yaas ab aap kahāñ aur kahāñ bāñg-e-jaras
kaun is vādī-e-ġhurbat meñ tumhārā hotā

vo kaun log the raas aa.ī jin ko ġhurbat bhī
hameñ to ahl-e-vatan ajnabī samajhte haiñ

dasht-e-ġhurbat meñ nahīñ phirtā huuñ ḳhud āvāra
gardish-e-charḳh-e-sitamgār liye phirtī hai

rahā be-ḳhabar ahl-e-ġhurbat ke ġham se
so ḳhud gir rahā huuñ maiñ apnī nazar se

ġhurbat meñ tumhārī turbat par rone ko 'hafīz' aatā koī
ab shukr karo aañsū to puchhe chhiḌkāv bhī abr-e-karam ne kiyā

ġham-e-ma.āsh vatan meñ yahāñ ġham-e-ġhurbat
ḳharāb haal vahāñ bhī rahe yahāñ bhī rahe

musalsal ḳhāna-jañgī qahat-sālī bhuuk ġhurbat aur vabā.eñ
jis ke darvāze pe dastak de rahī haiñ

safar nasīb hī Thahrā jo dasht-e-ġhurbat kā
to phir gumāñ meñ fareb-e-sahāb kyā rakhnā

vo jab ThanDā huā ġhurbat ke hāthoñ
usī muTThī se chaar aane bhī nikle

ghar ke chhuTne kā asar ālam-e-ġhurbat kā ḳhayāl
kaifiyat dil kī ajab vaqt-e-safar hotī hai

joñ naqsh-e-pā hai ġhurbat hairān-kār us kī
āvāra ho vatan se jo yaar tak na pahuñchā

muflis ne gar amiir ko chāñTā jaḌā to kyā
ātish-fishāñ bhī paltā hai ġhurbat ke sañg sañg

lafz meñ nik.hat-e-gul Dhaal ke ham
dasht-e-ġhurbat meñ vatan laa.e haiñ