Tags-Poverty

sune koī mirī ġhurbat kī dāstāñ mujh se
bhulāyā qissa-e-paimān-e-avvalīñ meñ ne

milne kā nahīñ rizq-e-muqaddar se sivā aur
kyā ghar meñ ḳhudā aur hai ġhurbat meñ ḳhudā aur

dasht-e-ġhurbat meñ tire ḳhāk-nashīñ achchhe haiñ
chāhiye aur inheñ be-sar-o-sāmāñ karnā

nā-āshnā haiñ 'rām' jo ġhurbat ke naam se
vo kaash mere daur ke fankār dekhte

yā shab kī saltanat meñ din kā safīr aayā
ġhurbat meñ aa ke chamkā gumnām thā vatan meñ

us ne ġhurbat ke badan pe
basantī cholā piilī pagḌī

ai jān-e-ārzū vo qayāmat se kam na the
kaaTe tire baġhair jo ġhurbat meñ chaar din

lamha lamha dhuup se tap kar huā
dasht-e-ġhurbat meñ sunahrā aadmī

gard-e-ġhurbat se bharī hai mere maskan kī bahār
dāman-e-sub.h-e-vatan meñ gul hai gul meñ ḳhaak hai

kabhī kabhī jo vo ġhurbat-kade meñ aa.e haiñ
mire bahe hue aañsū jabīñ pe laa.e haiñ

jab dhuup oḌhe baiThī ho ġhurbat qatār meñ
samjho ḳhudī kā āḳhirī zevar tamām-shud

ruuh ko rāh-e-adam meñ mirā tan yaad aayā
dasht-e-ġhurbat meñ musāfir ko vatan yaad aayā

dar-ba-dar phir ke dilā ghar kī hameñ qadr huī
rāh-e-ġhurbat meñ jo bhūle to vatan yaad aayā

kāTnā thā mujhe koh-e-shab-e-ġhurbat lekin
TuuT kar girtā rahā raah meñ bhālā merā

zindagī kaT to rahī hai 'nātiq'
ḳhair ġhurbat hai to ġhurbat hī sahī

is ġhurbat kī dhuup meñ 'shā.ir' apnoñ kā saaya bhī na thā
jis ġhurbat kī dhuup meñ ham ko yaad aa.e begāne tak

chhoḌ kar chal diyā ġhurbat meñ vahī dil mujh ko
ek hamdard milā thā jo ba-mushkil mujh ko

kunj-e-ġhurbat meñ 'muzaffar' ne ġhanīmat samjhā
jis qadar bhī vo huā be-sar-o-sāmāñ jānāñ

dasht-e-ġhurbat hai to vo kyuuñ haiñ ḳhafā ham se bahut
ham dukhī baiThe haiñ lag chal na sabā ham se bahut