Tags-Pyas

tishnagī merī ajab ret kā manzar niklī
mere hoñToñ pe hue ḳhushk samundar saare

saḳht ek lamhe kī rau meñ aa ke tauba kar ga.e
halq meñ mere magar ab tishnagī chubhne lagī

har aañkh meñ thī TūTte lamhoñ kī tishnagī
har jism pe thā vaqt kā saaya paḌā huā

us kī āñkhoñ meñ Duub kar dekhā
tishnagī baḌh ga.ī hai paanī meñ

sarāboñ se sarāboñ ke safar tak
taḌap baḌhtī ga.ī hai tishnagī meñ

oḌh kar tan pe tishnagī kī ridā
man ko mohan ke dvaar kar dekho

tishnagī jam ga.ī patthar kī tarah hoñToñ par
Duub kar bhī tire dariyā se maiñ pyāsā niklā

tum apnī niim sī āñkhoñ se hī pilā Daalo
mire laboñ pe piyāloñ kī tishnagī kam hai

jilau meñ tishnagī āñkhoñ meñ sāhil
kahīñ siine meñ sahrā jā-guzīñ thā

aisā na ho ki chaaT le sāhil ko tishnagī
ai mauj ab to aa koī rasta nikāl kar

sarāb-e-ḳhvāb kī ta.abīr jū-e-āb sahī
maiñ sochtā huuñ magar dasht-e-tishnagī ke liye

mere karb-e-tishnagī par raat shīshe ro paḌe
ḳhushk hoñToñ ko mire sāġhar sadā detā rahā

khāre paanī kā samundar yuuñ huā mujh ko atā
umr bhar hoñToñ pe mere tishnagī qaa.em rahe

ek ilāj-e-dā.imī hai to barā-e-tishnagī
pahle hī ghūñT meñ agar zahr milā diyā karo

tishnagī kī alāmāt ke taur par
do hī naam ā.eñge karbalā aur maiñ

uḌī tishnagī ke kūche meñ vo gard ik taraf se
ham uThā sake na tāqoñ se gire hue subū bhī

ek dariyā ko pī liyā ham ne
phir bhī baaqī hai tishnagī tauba

tire paas aa ke bhī jaane kyuuñ mirī tishnagī meñ hirās thā
ba-misāl-e-chashm-e-ġhazāl jo lab-e-ābjū bhī Darī rahī

na jaane tishnagī thī yā koī ehsās-e-mahrūmī
jale ik aag meñ ham-umr bhar āhista āhista