Tags-Pyas

bujhā bujhā sā hai qalb-e-sahrā bujhī bujhī sī hai reg-e-tābāñ
fareb khā.egī tishnagī kyā sarāb bhī bujh ke rah ga.e haiñ

dariyā samajh liyā jise niklā vahī sarāb
ik harf-e-tishnagī ke gunahgār ham bhī haiñ

bas tishnagī kī aañkh se dekhā karo unheñ
dariyā ravāñ-davāñ haiñ chamakte sarāb ke

vo tishnagī thī ki shabnam ko hoñT tarse haiñ
vo aab huuñ ki muqayyad guhar guhar meñ rahūñ

tishnagī mohr-ba-lab tishna-labī hai ab to
chashm-e-sāqī kī shikāyat nahīñ karne detī

mujhe to karnī paḌī ābyārī-e-sahrā
magar nasīb meñ thī tishnagī samundar kī

tohmat-e-mai-kashī bhī uThā.ī
tishnagī hai ki sho.ala-ba-jāñ hai

idhar hai mirī tishnagī kā mudāvā
udhar mere dard-e-jigar kī davā hai

surāhī kā bharam khultā na merī tishnagī hotī
zarā tum ne nigāh-e-nāz ko taklīf dī hotī

abr barsegā TuuT kar jis din
duur dhartī kī tishnagī hogī

tishnagī hai ki bujhā.e nahīñ bujhtī 'sardār'
baḌh ga.ī kausar-o-tasnīm kī sauġhāt ke ba.ad

sirāt-e-ishq hai aur hijr kī tanhā masāfat hai
vahī hai tishnagī phir bhī fareb-e-āb zinda hai

tishnagī apnī bujhā.eñ kaise ham
jo samundar thā vo ab sahrā huā

tīrgī ḳhāmushī bebasī tishnagī
hijr kī raat meñ ḳhāmiyāñ ḳhāmiyāñ

havā meñ shāmil thī tishnagī us ke tan-badan kī
havā ne merā badan jalāyā to maiñ ne jaanā

damak rahā hai jo nas nas kī tishnagī se badan
is aag ko na tirā pairahan chhupā.egā

ḳhemgī-e-shab hai tishnagī din hai
vahī dariyā hai aur vahī din hai

vo kaun log haiñ jo tishnagī kī shiddat se
kanār-e-āb pighalte dikhā.ī dete haiñ

darmiyāñ rashk-o-hasad ke aaj bhī uljhe haiñ log
thā garāñ kal bhī ilāj-e-tishnagī-dāmāñ bahut

āb-e-haivāñ bhī gar mile to na leñ
apne me.ār-e-tishnagī ke liye