Tags-Pyas

tishnagī kā ek ik pahlū ubhārā jā.egā
vasl kī shab ko bhī furqat meñ guzārā jā.egā

daad de zarf-e-samā.at to karam hai varna
tishnagī hai mirī āvāz kī naġhma kyā hai

mirī pyaas kā muqaddar to ye tishnagī hī Thahrī
ġham-e-ishq kī thī chhāgal maiñ chhalak ke jā rahī huuñ

dasht-paimā.ī meñ bhī vahshat-e-jāñ itnī na thī
tishnagī sāhil-e-dariyā pe hirāsāñ kyuuñ hai

ham ne dekhā hai bhīgī palkoñ ko
aap kyā jāneñ tishnagī kyā hai

phailtā jaatā hai ThanDī chāñdnī ke saath saath
sho.ala sho.ala lazzatoñ kī tishnagī kā dā.era

phir is ke baad hameñ tishnagī rahe na rahe
kuchh aur der muravvat se kaam le saaqī

samundar tishnagī kā ab sarāb-e-ishq meñ zam hai
shikasta haal merā shīsha-e-pindār hai phir bhī

tamām umr mujhe tishnagī rulā.egī
mire vajūd ke pyāle meñ pyaas bhar ke na jā

nahīñ shikva-e-tishnagī mai-kashoñ ko
vo āñkhoñ se mai-ḳhāne barsā rahe haiñ

ye fāsloñ ke sarāboñ se sair ho na sake
na jaane tishnagī kitnī hai mere paañv meñ

ye manzil hai to ai as.hāb-e-manzil
ye merī ruuh meñ kyā tishnagī hai

zabāna-zan thā jigar-soz tishnagī kā azaab
so jauf-e-sīna meñ dozaḳh uñDel lī maiñ ne

nigār-e-mai-kada sab se ziyāda qābil-e-rahm
vo tishna-kām haiñ jo tishnagī se khelte haiñ

jo mazā hai tishnagī meñ hai jo lutf-e-be-qarārī
tujhe kyā batā.ūñ hamdam tirā dil jalā nahīñ hai

zarūrī to nahīñ takmīl se taskīn ho jaa.e
samundar ko bhī aksar tishnagī mahsūs hotī hai

maiñ ye chāhtā huuñ ki umr-bhar rahe tishnagī mire ishq meñ
koī justujū rahe darmiyāñ tire saath bhī tire ba.ad bhī

kyā lutf-e-tishnagī thā mujhe kuchh ḳhabar nahīñ
kitne samundaroñ se maiñ pyāsā guzar gayā

jo aañkh ho to dekh tū sarāb hī sarāb hai
na e'tibār tishnagī meñ mauj-e-āb par karo

ham ki the lazzat-e-hayāt meñ gum
jaañ se ik mauj-e-tishnagī aa.ī