Tags-Pyas

agar yaqīn nahīñ hai najābat-e-mai par
to laakh piite raho tishnagī nahīñ jaatī

mohabbat aur kyā hai ik sarāb-e-tishnagī to hai
vahī sahrā kī cham-cham meñ chamakte aab kī hasrat

ā.īna huī tishnagī pāyābī-e-jāñ se
chehre pa to likkhī hui rusvā.ī kahāñ hai

maiñ ilāj-e-ġham bhī na kar sakā tirā jaam to bhī na bhar sakā
hai har ek moḌ pe tishnagī tire gaañv meñ mire shahr meñ

us ke hoñToñ se jhalaktī hai mirī lab-tishnagī
khiñch rahī hai mai kahāñ par aur sāġhar hai kahāñ

siyāh sāyoñ kī tishnagī meñ
udaas lamhoñ ko saath rakkho

Dubo na de kahīñ mujh ko bhī tishnagī kā safar
ki reg reg sarāboñ kā silsila huuñ maiñ

tirā husn hai vo sahbā ki koī misāl kyā de
kabhī tishnagī bujhā de kabhī tishnagī baḌhā de

balā se ham na piyeñ mai-kada to garm huā
ba-qadr-e-tishnagī ranj-e-ḳhumār apnā hai

pūchhtā hai rāh-rau se ye sarāb
tishnagī kā naam hai dariyā bhī kyā

shu.ūr-e-tishnagī ko aam kar do
maiñ kab kahtā huuñ merā jaam bhar do

tishnagī meñ lab bhigo lenā bhī kaafī hai 'farāz'
jaam meñ sahbā hai yā zahrāb mat dekhā karo

hamāre dil se koī pūchhe qadr us mai kī
jo ek buuñd sahī vaqt-e-tishnagī to milī

mire hoñToñ ko dariyā ne kiyā sairāb lekin
hayāt-afroz dil kī tishnagī gum ho ga.ī hai

zindagī kyā hai ek manzar hai
ret hai tishnagī hai kīkar hai

shiddat-e-tishnagī meñ bhī ġhairat-e-mai-kashī rahī
us ne jo pher lī nazar maiñ ne bhī jaam rakh diyā

tishnagī jī kī baḌhtī jaatī hai
sāmne ik sarāb rahtā hai

sahrā kā ḳhaar ḳhaar hai mahrūm-e-tishnagī
kitnā sitam zarīf vo chhālā thā paañv kā

maiñ jab lamhe lamhe kā ras pī chukā
to kuchh aur jaagī mirī tishnagī

hai thakan aisī mirā paar utarnā hai muhāl
tishnagī vo hai ki bahtā huā dariyā chāhūñ