Tags-Pyas

kyuuñ kar ai 'ābid' bujhā paatā maiñ apnī tishnagī
mujh tak aane hī se pahle ho gayā paanī havā

mashq-e-ḳhud-āshāmī karūñ sairāb honā siikh luuñ
labrez ḳhud hai tishnagī sāġhar mirā ḳhālī to hai

ḳhvāhishoñ kī ġhulām-gardish meñ
tishnagī bāryāb kī chaukhaT

tishnagī thī kueñ kī qīmat meñ
badlī chhā.ī girā ga.ī miTTī

tirī tishnagī isī dast-e-zād kī muntazir
dil-e-ḳhush-gumāñ tirī ḳhvāhishāt ajiib haiñ

tishnagī achchhī nahīñ rakhnā bahut
rauzan-e-gul se use taknā bahut

kahīñ āñsuoñ kī hai dāstāñ kahīñ muskurāhaToñ kā bayāñ
kahīñ barkatoñ kī haiñ bārisheñ kahīñ tishnagī be-hisāb hai

tishnagī had se sivā aur safar jaarī hai
par sarāboñ se bahal jaa.eñ zarūrī to nahīñ

ik shahādat-numā tishnagī thī muqaddar mirā
maiñ jidhar bhī gayā saath meñ karbalā.eñ chalīñ

tishnagī dil kī bujhānā to ḳhabar kar denā
ashk āñkhoñ meñ chhupānā to ḳhabar kar denā

nigah kī tishnagī aisī ki sair hotī nahīñ
maiñ tishna āñkhoñ meñ terā jamāl rakhtī huuñ

damak rahā hai jo nas nas kī tishnagī se badan
is aag ko na tirā pairahan chhupā.egā

jalte manzar se judā honā paḌegā kuchh ko
tishnagī tujh ko agar dīda-e-tar meñ le jā.ūñ

kyā karūñ ai tishnagī terā mudāvā bas vo lab
jin laboñ ko chhū ke paanī aag bantā jaa.e hai

is ek baat kī sharmindagī ne maar diyā
mire vajūd tirī tishnagī bachī huī thī

bahut thī tishnagī dariyā bahut thā
sarāboñ se Dhakā sahrā bahut thā

ġham kī har ek baat ko ab ġham pe chhoḌ de
is tishnagī ko qatra-e-shabnam pe chhoḌ de

hudūd-e-jism se aage baḌhe to ye dekhā
ki tishnagī thī barahna tirī adāoñ tak

jis tarah dariyā bujhā sakte nahīñ sahrā kī pyaas
apne andar ek aisī tishnagī ban jā.iye

sarāb-e-umr-e-tamannā kī tishnagī huuñ maiñ
agar hai chashma-e-faiyāz to bujhā mujh ko