Tags-Pyas

mauj-e-ḳhayāl meñ na kisī jal-parī meñ aa.e
dariyā ke saare rañg mirī tishnagī meñ aa.e

tishnagī miT na sakī kām-o-dahan kī 'fāriġh'
zindagī muft meñ marhūn-e-ḳharābāt huī

aa terī tishnagī kā mudāvā hai mere paas
merā lahū halāl hai tujh par mire aziiz

ka.ī sarāb mile tishnagī ke raste meñ
rukāvaTeñ haiñ bahut raushnī ke raste meñ

chhalak rahī hai mai-e-nāb tishnagī ke liye
sañvar rahī hai tirī bazm barhamī ke liye

ye to sadqa hai husain-ibn-e-alī kā 'aḳhtar'
tishnagī ham jo sar-e-āb liye phirte haiñ

tishnagī piine ki shab thī
aabjū hone kā din thā

bisāt-e-dahr sahī jalva-gāh-e-husn-e-azal
nigāh-e-shauq fuġhāñ-sanj-e-tishnagī kyuuñ hai

tishnagī ḳhaak bujhe ashk kī tuġhyānī se
ain barsāt meñ bigḌe hai mazā paanī kā

dil ḳhud huā asiir zanaḳhdān-e-yār meñ
laatī hai tishnagī hī pyāse ko chaah par

samundaroñ ke sāhiloñ pe ḳhaak uḌ rahī hai ab
jo tishnagī kī aab the vo tishna-lab guzar ga.e

dil bujhā bujhā tishnagī kī aañch
ajnabī thakan zindagī kī aañch

ḳhāk-e-karbal meñ aaj bhī logo
ik ajab tishnagī muqayyad hai

hamārī pyaas ke sūraj ne Daal kar kirneñ
kiyā hai gahre samundar ko tishnagī ke qarīb

ye ab maiñ āgahī kī kaun sī manzil pe aa pahuñchā
mujhe sairābiyoñ meñ tishnagī mahsūs hotī hai

reg-zāroñ meñ chalā qāfila-e-mauj-e-hayāt
tishnagī ret ke sahrā meñ samundar badle

na jaane chhalkā.e jaam kitne na jaane kitne subū uchhāle
magar mirī tishnagī ki ab bhī tirī nazar se shikāyateñ haiñ

na tishnagī na ishtihā na hirs hai na aar hai
zabān-e-ġhaznavī pe ab ayaaz hī ayaaz hai

dariyā kī tishnagī meñ insāñ kī bebasī meñ
paayā tujhe hai yārab dil kī shikastagī meñ

regzār-e-hijr meñ ehsās ke zamzam nihāñ
is jagah to tishnagī kā silsila kuchh aur hai