Tags-Pyas

zabāñ ko detā hai ehsās-e-tishnagī se najāt
vo zā.iqa hai sukūt-e-sarāb apnī jagah

tishnagī kī aañkh meñ be-samt tevar dekh kar
kitne dariyā-dil samundar bhī nadī hone lage

tishnagī kī vo shiddat ko bhūlegā kyā dhuup kī vo tamāzat ko bhūlegā kyā
terī be-faiz āñkheñ jise yaad haiñ terā be-sāya gesū jise yaad hai

ye soch kis darja tishnagī se mare the ham log
ki paanī pī nahīñ rahe the paanī bachā rahe the

kaisā sunsān hai dasht-e-āvārgī
har taraf dhuup hai har taraf tishnagī

tishnagī apnī sadāoñ sī bhaTaktī hotī
ret kā Dher sarāboñ kā samundar hotā

koī dariyā na samundar na sarāb
tishnagī bol kidhar jaanā hai

tishnagī baaqī rahe dīvāngī baaqī rahe
ranj-o-ġham hai is liye tā-ki ḳhushī baaqī rahe

tishnagī laakh sahī ghar se na niklo 'rāshid'
raat siine meñ utar jā.egī sahrā ban kar

maiñ tire jism ko chhūte hue yuuñ Dartā huuñ
tishnagī aur baḌhā degā tū dariyā ban kar

pī ke sarshār bhī huuñ pyāsā bhī
tishnagī bhī ho tum nasha bhī ho

ye tishnagī ye pās-e-vafā ye hujūm-e-ġham
kyā kārvān-e-shauq kisī karbalā meñ hai

samundar aur sāhil pyaas kī zinda alāmat haiñ
unheñ maiñ tishnagī kī had ko bhī chhū kar banātī huuñ

haqīqateñ hoñ mayassar to ḳhvāb kyuuñ dekhūñ
maiñ tishnagī meñ bhī samt-e-sarāb kyuuñ dekhūñ

vo shai kahāñ hai pinhāñ ai mauj-e-āb-e-haivāñ
jo vaj.h-e-sar-ḳhushī thī barsoñ kī tishnagī meñ

tishnagī zaaġh ne apnī to bujhā lī pal meñ
haif gāgar meñ paḌe rah ga.e kañkar saare

tishnagī bhī maslahat hai lekin andāze ke saath
zarf vaale ab hameñ itnā na tarsāyā kareñ

kuchh sāġharoñ meñ zahr hai kuchh meñ sharāb hai
ye mas.ala hai tishnagī kis se bujhā.ī jaa.e

hai jis kī Thokaroñ meñ āb-e-zindagī 'vāmiq'
vo tishnagī kā samundar dikhā.ī detā hai

abhī aate nahīñ us rind ko ādāb-e-mai-ḳhāna
jo apnī tishnagī ko faiz-e-sāqī kī kamī samjhe