Tags-Qasid

sun ai qāsid unheñ zid hai to ham ko baat kī pach hai
munāsib vo agar samjheñ to ye takrār rahne deñ

qāsid aayā magar javāb nahīñ
mere likhe kā bhī javāb nahīñ

ye kahnā us se ai qāsid jo mahv-e-ḳhud-parastī hai
ki tere dekhne ko aañkh muddat se tarastī hai

ro ke us shoḳh se qāsid mirā ronā kahnā
hañs paḌe us pe to phir harf-e-tamannā kahnā

ḳhat ke purze aa.e haiñ qāsid kā sar tasvīr-e-ġhair
ye hai bhejā us sitamgar ne mire ḳhat kā javāb

qāsid to saaf kah dī mukaddar hai mujh se kyā
likhā jo naama yaar ne ḳhat-e-ġhubār meñ

mukarrar zindagānī kā mazā ho jā.egā hāsil
dam-e-āḳhir bhī qāsid le ke gur ḳhat kā javāb aayā

sanam ke paas se qāsid phirā hai
ḳhudā jaane ki maiñ nā-ḳhush huuñ yā ḳhush

lagā ke paañv meñ us ke uḌā.ūñ qāsid ko
agar mujhe tire tausan kī gard-e-rāh mile

ai qāsid-e-ashk o paik-e-sabā us tak na payām-o-ḳhat pahuñchā
tum kyā karo haañ qismat kā likhā ye bhī na huā vo bhī na huā

ḳhūn-e-qāsid to vo saffāk samajhtā hai halāl
kisī ġhammāz se bhejvā.eñge paiġhām ko ham

luT gayā kārvān-e-sabr-o-qarār
qāsid-e-ashk ashk-bār aayā

dil kā ahvāl jo khultā nahīñ tū ne ai chashm
qāsid-e-ashk ko aane se magar band kiyā

hai sub.h se kuchh aaj mire dil ko bashāshat
us kūche se qāsid to na ḳhat le ke chalā ho

sanam tāq-e-haram se daf.atan nīche utar aa.e
adab thā bas ki vājib dost ke qāsid ke tal.at kā

mirī jaarī haiñ aañsū aah qāsid
shitābī kah ye us ko mājrā jā

zabāñ par hai qāsid kī apnī rasā.ī
huā huuñ payām zabānī kī sūrat

saaf qāsid ko vaañ javāb milā
mere ḳhat kā yahī javāb milā

jo ḳhauf tūfān-e-ashk se ab nahīñ hai jaatā na jaa.e qāsid
ravāñ karūñ sū-e-yār-e-jānī ḳhatoñ kī nāveñ banā banā kar

ḳhat bhī diyā to qāsid-e-ġhaflat-shi.ār ko
naama mirā bañdhā huā bāzū-e-shal meñ hai