Tags-Qasid

harīm-e-mahmil meñ aa gayā huuñ salām le lo
salām le lo ki maiñ tumhārā amīn-e-qāsid ḳhajil musāfir azā kī vaadī se lauT aayā

qāsid se us ne sun ke haqīqat kahā ki vaah
kyā ḳhuub is suḳhan kā koī ye maqām hai

qāsid kahāñ chalā hai mujhe bhī ḳhabar to de
yak dam tū baiTh jā ki mujhe tujh se kaam hai

kyā jaane kyā likhā thā use iztirāb meñ
qāsid kī laash aa.ī hai ḳhat ke javāb meñ

ta.ammul to thā un ko aane meñ qāsid
magar ye batā tarz-e-inkār kyā thī

ajab kyā hai ki qāsid bhuul jaa.e us kā le jaanā
likhūñ jis naame meñ shikva tirī ġhaflat-shi.ārī kā

aa jaa.eñ vo magar mujhe aatā nahīñ yaqīñ
qāsid kā jo hai qaul vo ḳhat meñ raqam bhī hai

bole qāsid se 'sharaf' ke naam par
vo hameñ bulvāne vaalā kaun thā

qāsid javāb-e-ḳhat ham likh deñ shitāb kyūñkar
vaañ to javāb māñgā likhiye javāb kyūñkar

is baar to aayā thā idhar qāsid-e-jāñ ḳhud
sarkār ko pahuñchā nahīñ paiġhām hamārā

kahāñ qāsid ne ki laayā huuñ maiñ paiġhām-e-visāl
aaj ḳhil.at mujhe pahnāo ki jāgīreñ do

koī ḳhush-ḳhvān ho qāsid to bahut behtar hai
mere naame meñ tarāne kī bhī tahrīreñ haiñ

qāsid us harf-e-nā-shunū tak jald
yahī jāgah payām hai merā

agar qāsid haqīqat meñ payām-e-vasl laayā hai
to kyuuñ aañsū bhare muñh dekhtā hai ġham-gusār apnā

kisī ummīd par zinda rahūñ yā ghuT ke mar jā.ūñ
vo kyā kahte haiñ ai qāsid vo kyā irshād karte haiñ

hāl-e-dil kahvāte the jab qāsid aate jaate the
nāma-e-shauq aur paiġhām-e-zabānī ab kahāñ

uzr jaane meñ na kar ai qāsid
tū bhī nādān huā jaatā hai

jo laash bhejī thī qāsid kī bhejte ḳhat bhī
rasīd vo to mire ḳhat kī thī javāb na thā

hai dayār-e-māh-rū kā bas yahī qāsid nishāñ
āsmāñ tujh ko nazar aa.egī vaañ kī sar-zamīñ

bayāñ jo jo ki sūrat tujh se kī hai maiñ ne ai qāsid
tū us ke kaan meñ jhuk kar usī sūrat se kah diijo