Tags-Qasid

ḳhudā kā shukr savere hī aa gayā qāsid
maiñ bach gayā shab-e-furqat ke naaz uThāne se

haa.e qismat kā likhā aa.e to qāsid ye kahe
ḳhat tumhāre liye vo kar ke raqam bhuul ga.e

aayā na phir ke ek bhī kūche se yaar ke
qāsid gayā nasīm ga.ī nāma-bar gayā

dam le ke lauT jā.ūñgā o mezbāñ zamīñ
qāsid banā ke duur se bhejā gayā huuñ maiñ

har harf bas-ki royā hai haal par hamāre
qāsid ke haath meñ ḳhat namnāk ho gayā hai

koī qāsid ho ki nāseh koī āshiq ki adū
sab kī us shoḳh se vābastagiyāñ ek sī haiñ

har roz mujh ko apnā badalnā paḌā javāb
roz ik sabaq paḌhātā hai qāsid nayā mujhe

dil ko isī sabab se hai iztirāb shāyad
qāsid phirā hai le kar ḳhat kā javāb shāyad

so rahā huuñ meñ liye ḳhālī lifāfa haath meñ
us meñ jo mazmūñ thā vo qāsid churā kar le gayā

'nāsiḳh' kaheñ jald aa ke kaheñ qāsid-e-jānāñ
ḳhat lījiye dilvā.iye in.aam hamārā

avval to na qāsid ko rahe kū-e-sanam yaad
pahuñche to farāmosh ho paiġhām hamārā

ilāhī qāsid abhī na aa.e ki ye tavaqqo.a bhī hai ġhanīmat
kiyā gar inkār saaf us ne to dil kī taskīn kyā kareñge

tālib-e-bosa huuñ maiñ qāsid vo haiñ ḳhvāhān-e-jān
ye zarā sī baat hai milte hī tai ho jā.egī

vo aur va.ada vasl kā qāsid nahīñ nahīñ
sach sach batā ye lafz unhī kī zabāñ ke haiñ

kuchh kahā hogā us ne bhī qāsid
kuchh na kuchh terī bhī sharārat hai

qāsid-e-āshiq-e-saudā-zada kyā laa.e javāb
jab na mālūm ho ghar aur na patā yaad rahe

pahuñche na vahāñ tak ye duā maañg rahā huuñ
qāsid ko udhar bhej ke dhyān aa.e hai kyā kyā

qatl-e-qāsid pe kamar bāñdhī hai 'shola' us ne
ḳhat kitābat kī mulāqāt hai ye bhī na sahī

kyā mire haal pe sach-much unheñ ġham thā qāsid
tū ne dekhā thā sitāra sar-e-mizhgāñ koī

javāb-e-ḳhat kā na qāsid se mājrā pūchho
hai saaf chehre se zāhir ki sharmsār aayā