Tags-Qatil

tirī nigah ke tasavvur meñ ham ne ai qātil
lagā lagā ke gale se chhurī ko pyaar kiyā

sunā hai teġh ko qātil ne āb-dār kiyā
agar ye sach hai to be-shubah ham pe vaar kiyā

har saañs se dars-e-aman diyā har jabr pe dād-e-ulfat dī
qātil ko bhī gar lab hil na sake āñkhoñ se duā-e-rahmat dī

kuchh vahm sadd-e-rāh-e-sitam thā ki vaqt-e-zab.h
mere gulū pe ḳhanjar-e-qātil ravāñ na thā

kahtā hai ye pukār ke ḳhūn-e-shahīd-e-nāz
qātil maiñ tere gosha-e-dāmāñ se duur huuñ

huā hai nairañg aaj kaisā ye dil meñ qātil ke kyā Thanī hai
jidhar se guzrā zabāñ se niklā ye kushtanī hai vo kushtanī hai

shaad us se hoñ ki is qātil-e-ālam ne ḳhud aaj
kah ke o āshiq-e-nāshād pukārā mujh ko

naqd-e-jāñ nazr karūñ tere phir ai qātil-e-ḳhalq
zinda kar de agar allāh dobārā mujh ko

tamām ho ga.e ham ik nigāh-e-qātil se
rageñ gale kī taḌaptī rahīñ chhurī ke liye

ye aur dāman-e-qātil hai chhūT jā.egā
lahū meñ josh to barsoñ se thā isī ke liye

likhā tumhīñ ne lahū se kamāl-e-goyā.ī
tum hī ne ḳhanjar-e-qātil ko hai zabāñ likkhā

apne qātil kī zehānat se pareshān huuñ maiñ
roz ik maut na.e tarz kī ījād kare

pukāriye kaf-e-qātil ko ab muālij-e-dil
baḌhe jo nāḳhun-e-ḳhanjar girah-kushā kahiye

kiyā qātil ne bismil ko mire dekh
mujhe lagtā hai is kā loTnā ḳhush

koī qātil kī raah bhūlā thā
ai ajal tū ne rahnumā.ī kī

agar tum bosa-e-seb-e-zaqan se ho ga.e qātil
gale par pher diije mere chāqū meva-ḳhorī kā

maiñ kyā karūñ mire qātil na chāhne par bhī
tire liye mire dil se duā nikaltī hai

apne abrū aa.ine meñ dekh kar bismil huā
khīñch kar talvār apnā aap vo qātil huā

haa.e kis qātil-adā se kī shurūa us ne namāz
niklī jab takbīr us ke muñh se maiñ bismil huā