Tags-Qatil

ḳhud-numā.ī ke bhī is daur meñ ham ko 'sāhir'
koī qātil na milā koī masīhā na milā

vaqt-e-zab.h bolā ye qātil āshiq-e-nād-shād se
TukḌe kar Daalā kabhī tū ne jo maare hāth-pāoñ

vahāñ par zindagī kaise bachegī
jahāñ qātil masīhā ho rahā hai

ba-qaul-e-shā.ir-e-mashriq maiñ apnā qātil-e-jāñ
havā-e-tund bhī maiñ barg-e-be-navā bhī maiñ

maiñ hashr ke din da.avā ḳhuuñ kis se karūñgā
vo kushta huuñ jis kushta kā qātil nahīñ ma.alūm

mirā qātil mire andar chhupā thā
magar bad-nām ḳhilqat ho rahī thī

mere qātil se koī ai kaash itnā pūchh le
ye zamīñ mere lahū se paak ho jā.egī kyā

thī teġh usī haath meñ qātil bhī vahī thā
jo haath ki maqtal meñ nazar hī nahīñ aayā

chhup nahīñ saktā vo ḳhuun apne dil-e-bismil kā hai
miT nahīñ saktā jo dhabba dāman-e-qātil kā hai

saare kushtoñ se judā Dhañg iztirāb-e-dil kā hai
kyuuñ na ho bismil bhī to kis chulbule qātil kā hai

shoḳhī-e-qātil meñ hai bismil kā rañg-e-iztirāb
rañg bismil kī taḌap meñ shoḳhī-e-qātil kā hai

vasl kī shab ḳhuun karnā ārzū-e-vasl kā
o tamannāoñ ke dushman kaam ye qātil kā hai

imtihāñ madd-e-nazar kis manchale bismil kā hai
ma.arka aarā jo yuuñ har naaz us qātil kā hai

har saañs se dars-e-aman diyā har jabr pe dād-e-ulfat dī
qātil ko bhī gar lab hil na sake āñkhoñ se duā-e-rahmat dī

shoḳhī se Thahartī nahīñ qātil kī nazar aaj
ye barq-e-balā dekhiye girtī hai kidhar aaj

ham apne aap ke qātil bane haiñ
ye kis tahzīb kī jādūgarī hai

ye kaisā moḌ hai behis zamāna-sāz yā qātil
sulagtī hai tamannā kī chitā āhista āhista

ab to har shaḳhs pe hotā hai gumāñ qātil kā
koī miltā hī nahīñ aadmī insāñ kī tarah

vafā ke paimān sab bhulā kar
jafā.eñ karte vafā ke qātil

mil rahā hai zindagī ko aaj unvāñ sahī
munfa.il kyuuñ ho nasīb-e-dushmanāñ qātil mirā