Tags-Qatil

ek baar aur use dekh luuñ marte marte
merā qātil hai kahāñ mujh ko vahāñ le ke chalo

kaj-kulāhī kī adā yaad aa.ī
kū-e-qātil kī havā yaad aa.ī

baiThā hai lau lagā.e koī teġh-e-nāz se
qātil kisī ke kaam meñ tāḳhīr ho na jaa.e

ġhaflat na kījiyo kabhī qātil kī yaad meñ
ai dil koī kamī tah-e-shamshīr ho na jaa.e

husn meñ jab naaz shāmil ho gayā
ek paidā aur qātil ho gayā

sar mirā tan se agar duur kiyā sar sadqe
rakhiyo qātil to mujhe apnī hī dīvār ke paas

vo kyā din the jo qātil-bin dil-e-ranjūr ro detā
mirā har zaḳhm juuñ vo teġh hotī duur, ro detā

kis ko fursat hai kare ham ko jo zinda sābit
bas yahī ek vakīl apnā hai qātil kyā hai

ġhair hī qatl kare mujh ko zarūrī to nahīñ
merā qātil hai shanāsā to shanāsā hī sahī

ḳhūn-e-dil hai surḳh-rūī kā nishāñ
mujh ko bismil apnā ai qātil samajh

laḌtā hai mujh se hashr meñ qātil ki kyuuñ uThā
goyā abhī sunī nahīñ āvāz suur kī

shiddat-e-shauq-e-shahādat kā kahūñ kyā aalam
teġh-e-qātil paḌī sar pe mire ehsāñ ho kar

tah-e-shamshīr-e-qātil kis qadar bashshāsh thā 'nāsiḳh'
ki aalam har dahān-e-zaḳhm par hai rū-e-ḳhandāñ kā

huā hai nairañg aaj kaisā ye dil meñ qātil ke kyā Thanī hai
jidhar se guzrā zabāñ se niklā ye kushtanī hai vo kushtanī hai

hameñ be-maut kyuuñ maarā ajal tū kis liye aa.ī
havā-e-bosa-e-shamshīr-e-qātil ham bhī rakhte the

agar tum bosa-e-seb-e-zaqan se ho ga.e qātil
gale par pher diije mere chāqū meva-ḳhorī kā

kisī ke jaal meñ aa kar maiñ apnā dil gañvā baiThā
mujhe thā ishq qātil se maiñ apnā sar kaTā baiThā

aaj phir sar-e-maqtal de ke ḳhud lahū ham ne
teġh-e-dast-e-qātil kī rakh lī aabrū ham ne

qatl se mere gar phire qātil
daañt se luuñ zabān-e-ḳhanjar kaaT

bahrūpiyā hai koī phire hai nagar nagar
qātil kā ruup dhāre kabhī chārasāz kā