Tags-Qatil

abrū meñ ḳham jabīñ meñ shikan aañkh meñ ġhazab
kyā mudda.ā hai qātil-e-ḳhanjar-kashīda kā

faisla kyā ho jān-e-bismil kā
maut ruḳh dekhtī hai qātil kā

maut bhī kaañp kaañp uThtī hai
naam sun sun ke mere qātil kā

qātil kī raah dekh le dam bhar na zahr khā
ai dil qazā ko aane de be-maut mar nahīñ

aaj dekhā sab ne qātil kī tahī-dastī kā haal
sail-e-ḳhūn-e-āshiqāñ meñ bah ga.e shamshīr-o-sañg

na.e zamāne meñ ab ye kamāl hone lagā
ki qatl kar ke bhī qātil nihāl hone lagā

dekhne bhī na paa.e qātil ko
zaḳhm itne hī lag ga.e paiham

kahte haiñ maarā gayā vo jurm-e-teġh-e-nāz se
kūcha-e-qātil meñ 'nāsiḳh' naam jo bechāra gayā

kabhī to lā ke milā mujh se mere qātil ko
jo sar hai dosh pe tere vabāl pūchhegā

kyā ajab ki bar aa.e dil kī aarzū 'tābāñ'
sair kū-e-qātil kī aap bhī kabhū kiije

koī qātil maiñ rahī 'mehr' se kitnī hī shahīd maiñ huuñ aur qaid-e-shadīd
ham-safīrān-e-chaman rā ki rasānd ḳhabre az man-e-nauha-gare

qātil ne adā kā kiyā jab vaar uchhal kar
maiñ ne sipar-e-dil kuuñ kiyā oT sambhal kar

ho laakh kamān kaḌī qātil kuchh jazb nishāne meñ bhī hai
baazū ke bal pe nazar kar ke andāza-e-zaḳhm-e-tīr na kar

yaar qātil mire jo jo ki lagātā thā vaar
lab pe har zaḳhm ke nikle thī sadā bismillāh

nā-gahāñ pañja-e-qātil se maiñ kyā chhūT gayā
us kī hasrat mire jiine kī duā kartī hai

kahe detā huuñ qātil le ḳhabar jāñ-bāz kī apne
fanā shauq-e-shahādat meñ kisī din jaan kar degā

husn jab qātil na thā aur ishq dīvāna na thā
zindagī meñ dard-o-ġham kā koī afsāna na thā

hai shor āmad-āmad qātil jo dair se
hañgāma jāñ-nisāroñ kā hai qatl-gāh meñ

na malak savāl karte na lahad fishār detī
sar-e-rāh-e-kū-e-qātil jo mirā mazār hotā

tiir aate haiñ kamīñ-gāh se merī jānib
merī taqdīr meñ kyā jalva-e-qātil bhī nahīñ