Tags-Qatil

kyūñkar karūñ zabt-e-āh qātil
ghāyal se pukār kyūñke jaave

qātil sabhī the chal diye maqtal se rātoñ raat
tanhā khaḌī laraztī rahī sirf merī zaat

afsāna mohabbat kā puurā ho to kaise ho
kuchh hai dil-e-qātil tak kuchh hai dil-e-bismil tak

fazā kī ālūdgī thī pahle hī niim qātil
ye dil meñ ek aur daaġh kaalā kahāñ se aayā

jalā sake jo dil-o-jāñ vahī nazar qātil
vagarna soz-o-tapish hai kahāñ sharāre meñ

munsif kī uñgliyoñ ke nishāñ ḳhanjaroñ pe haiñ
ab koī apne shahr meñ qātil nahīñ rahā

teġh-e-qātil ko pas-e-qatl nadāmat hogī
dam se 'bismil' hī ke ye ma.arka-ārā.ī hai

qatl karnā be-gunāhoñ kā koī āsān hai
ḳhushk qātil kā lahū hai ḳhūn-e-bismil dekh kar

jo chāragar the vo bhī hue qātil-e-hayāt
ab kaun hai ki apnā masīhā kaheñ jise

zamīñ hogī kisī qātil kā dāmāñ ham na kahte the
akārat jā.egā ḳhūn-e-shahīdāñ ham na kahte the

taklīf kisī ko gar pahūñchī tū is meñ takalluf kyā niklā
hairān jo rakhā qātil ko to ai shab-e-hijrāñ kuchh na kiyā

maiñ kyā kahūñ ki vo qātil thā yā masīhā thā
magar adāoñ se lagtā baḌā hī pyārā thā

mere qātil ke tajassus meñ bhaTakne vaalo
ḳhuun ālūd hai bastī meñ pasīna kis kā

maqtūloñ kā qaht paḌ na jaa.e
qātil kī kahīñ kamī nahīñ hai

haa.e kis qātil-adā se kī shurūa us ne namāz
niklī jab takbīr us ke muñh se maiñ bismil huā

jo yahāñ maġhlūb hai uqbā meñ ġhālib hai vahī
markab-e-maqtūl hai ik roz jo qātil huā

bhaag kar kab tujh se jāñ-bar koī ai qātil huā
uḌ chalā gar hosh apnā tā.ir-e-bismil huā

apne abrū aa.ine meñ dekh kar bismil huā
khīñch kar talvār apnā aap vo qātil huā

zikr aayā thā hayāt-e-abadī kā 'tābāñ'
log kyuuñ takne lage kūcha-e-qātil kī taraf

maqtal-e-nāz se guzre to guzarne vaale
phuul kuchh pheñk ga.e dāman-e-qātil kī taraf