Tags-Qatil

shafaq kah le koī chāhe shafaq-gūñ āsmāñ kah le
hameñ to kū-e-qātil kī zamīñ ma.alūm hotī hai

jaisī chāhe vaisī le mujh se qasam qātil na Dar
hashr ko bhī gar kabhī terā maiñ dāman-gīr huuñ

vo shaḳhs apnī jagah hai muraqqa-e-tahzīb
ye aur baat hai ki qātil usī kā naam bhī hai

kuchh tamāshā.ī bhī lāzim haiñ sar-e-maqtal 'tufail'
vo nahīñ hoñge to qātil kā hunar dekhegā kaun

chhīñTeñ jo ḳhuuñ kī dāman-e-qātil meñ rah ga.iiñ
mahshar meñ mere qalb kī tafsīr ho ga.ī

haath meñ qātil ke 'nīraj' phuul hai
baat ab ghabrāne vaalī ho ga.ī

dushman-e-mehr daġhābāz sitamgar qātil
jānte bhī ho zamāna tumheñ kahtā kyā hai

phal ye qātil ko diyā merī girāñ-jānī ne
toḌ kar Dher kiyā saikḌoñ talvāroñ ko

ye mushtāq-e-shahādat kis jagah jaa.eñ kise DhūñDeñ
ki terā kaam qātil jab tujhī se ho nahīñ saktā

hai dīdanī rañg-e-rū-e-qātil
har zaḳhm javāb māñgtā hai

sar-dādgān-e-ishq-o-mohabbat kī kyā kamī
qātil kī teġh tez ḳhudā kī zamīñ rahe

qātil tirī galī bhī badaun se kam nahīñ
jis ke qadam qadam pe mazār-e-shahīd hai

ye kyā qātil haiñ, pahle qatl karte haiñ mohabbat kā
phir us ke ba.ad iz.hār-e-pashemānī bhī karte haiñ

koī qātil hī kahīñ mil jaa.e
ek insān to zinda dekhūñ

kuchh vahm sadd-e-rāh-e-sitam thā ki vaqt-e-zab.h
mere gulū pe ḳhanjar-e-qātil ravāñ na thā

hue haiñ mahrūm-e-dīd-e-be-dil kiyā tajāhul kā us ne bismil
vo dil-rubā ban gayā hai qātil kamar ko kas ke safar ko chaliye

be-bāk na dekhā koī qātil ke barābar
sharm aañkh meñ paa.ī na ga.ī til ke barābar

lagānā vaar halkā qatl-gah meñ mujh pe ai qātil
ki lutf raqs-e-bismil maiñ dikhā.ūñ nīm-jāñ ho kar

ġhash aa na jaa.e dekh ke qātil ko mauj-e-ḳhūñ
nāzuk-mizāj kā kahīñ halkā lahū na ho

surḳhī hai teġh par na hinā tere haath meñ
qātil kahīñ safed adū kā lahū na ho