Tags-Qatil

udhar vo be-muravvat bevafā be-rahm qātil hai
idhar be-sabr-o-be-taskīn-o-be-tāqat mirā dil hai

vahī qātil vahī munsif banā hai
usī se faisla Thahrā huā hai

merā lahū chaTā.egā jab tak na teġh ko
qātil ko dahne haath kā khānā harām hai

ishq-e-dandāñ kī ḳhatā par qatl jo mujh ko kiyā
is liye shamshīr-e-qātil meñ bhī dandāna huā

qātil to aur bhī the bahut shahr-e-dard meñ
tujh sā magar 'jamīl' koī dūsrā na thā

haath gahrā lagā kū-e-qātil
zor-e-lazzat hai zaḳhm-e-kārī meñ

phir merī taraf phirā vo qātil
tasma na kahīñ lagā rahā ho

ḳhud kahā qātil se maiñ ne phir dobāra zab.h kar
kaT ke jab gardan dam-e-takbīr aadhī rah ga.ī

tez kab tak hogī kab tak baaḌh rakkhī jā.egī
ab to ai qātil tirī shamshīr aadhī rah ga.ī

maiñ to apnī jaan pe khel ke pyaar kī baazī jiit gayā
qātil haar ga.e jo ab tak ḳhuun ke chhīñTe dhote haiñ

abhī hai ḳhatra nafas nafas par abhī haiñ qātil galī galī meñ
'shakīl' āñkheñ na band karnā 'shakīl' ḳhud ko jagā.e rahnā

teġh ko saan pe rakkhā thā tabhī qātil ne
gardan apnī na huī thī abhī saarī tayyār

teġh-e-qātil ke gale milte haiñ ḳhush ho ho kar
īd-e-qurbāñ hai mohabbat ke gunah-gāroñ meñ

phir chalā maqtal-e-ushshāq kī jānib qātil
sar pe barpā kahīñ kushtoñ ke qayāmat na kare

ham bhī aa.e haiñ kafan bāñdh ke sar se qātil
dekhnā hai tirī chaltī huī shamshīr kā rañg

garche mohlik thā magar insāf kī ummīd par
muddatoñ ik zaḳhm qātil ko sadā detā rahā

bachā qātil kā dāman lillāhil-hamd
bahut khaulā huā apnā lahū thā

maiñ to qātil thā barī ho ke bhī qātil hī rahā
mujh ko insāf ne jiine kī sazā bhejī hai

ahl-e-mahshar dekh luuñ qātil ko to pahchān luuñ
bholī bholī shakl thī aur kuchh bhalā sā saam thā