Tags-Qatil

sach kahā zāhid ye tū ne zahr-e-qātil hai sharāb
ham bhī kahte the yahī jab tak bahār aa.ī na thī

qātil ko maiñ ne ḳhat nahīñ shanjarf se likhā
kis vaj.h se huā hai tū ab surḳh-rū qalam

chuum rahā huuñ us ke ik ik vaar ko maiñ
jaane maiñ ne dekh liyā kyā qātil meñ

qātil ko aaj sāhib-e-ejāz maan kar
dīvār-e-adl apnī jagah se sarak ga.ī

liye phirtā hai qātil haath meñ ḳhanjar barahna
muhayyā pairahan meñ āstīñ hote hue bhī

kaheñ qātil ko ham mahbūb agar hai ain nādānī
hazar lāzim hai aise shaḳhs se jo apnā dushman ho

tandurustī zaḳhm-e-kārī se huī
ye huā sharminda qātil ho ga.e

tīra-rātoñ meñ bhalā kaise jiyā jaatā hai
mere qātil bhī to ab mujh se ye Dhab pūchhte haiñ

idrīs o ḳhizr o iisā qātil se ham chhuḌā.e
un ḳhūñ-giraftagāñ par ehsān hai hamārā

qātil ko ġham-gusār samajhtā huuñ ab 'ra.īs'
maqtal meñ zindagī kī duā māñgtā huuñ maiñ

barahna rahtī hai shamshīr-e-abrū-e-qātil
misāl-e-teġh-e-ajal hājat-e-niyām nahīñ

dil kā har qatra-e-ḳhūñ rañg-e-hinā se māñgo
ḳhūñ-bahā dosto qātil kī adā se māñgo

shahādat meñ zafar raushan jabīñ ko dekh le aa kar
sun ai qātil mirī fat.h-e-mubīñ ko dekh le aa kar

yuuñ na qātil ko jab yaqīñ aayā
ham ne dil khol kar dikhā.ī choT

ye tai huā hai ki qātil ko bhī duā diije
ḳhud apnā ḳhuun bahā phir bhī ḳhūñ-bahā diije

ab mirī jaan bach ga.ī yaanī
ek qātil kī hai sipar darpesh

kyā Darātā hai mujhe teġh dikhā kar qātil
maqtal-e-ishq meñ marne ko maiñ tayyār aayā

tīr-e-qātil kā ye ehsāñ rah gayā
jā-e-dil siina meñ paikāñ rah gayā

ham ko to dard-e-judā.ī se hī mar jaanā thā
chand roz aur na qātil ko ishāra karte

na teġh-e-qātil kā kyuuñ ho shohrā kiyā hai jo rañg-e-jism aisā
diye jo Tāñke to hai ye dhokā badan kā malbūs sozanī hai