Tags-Qatil

teġh be-āb hai ne bāzū-e-qātil kamzor
kuchh girāñ-jānī hai kuchh maut ne fursat dī hai

teġh sī chaltī hai qātil kī dam-e-jañg zabāñ
sulh kā naam jo letā hai to haklātā hai

majbūriyoñ ke raaz na khul jaa.eñ ba.ad-e-marg
qātil hamāre qatl kā charchā kiyā na jaa.e

nahīñ pasand mire tañg-zehn qātil ko
ye harf-e-shukr ye ḳhanjar pe muskurānā mirā

dard-e-dil ko dāstāñ-dar-dāstāñ hone to do
shahr-e-qātil meñ zarā amn-o-amāñ hone to do

vo jis kā vaar muassar thā zarb kaarī thī
khaḌā huā thā vo qātil bhī pāsbānoñ meñ

kahnā na maanā kūcha-e-qātil meñ rah gayā
achchhā huā jo dil kisī mushkil meñ rah gayā

fikr us kī rañj us kā ummīd us kī kuchh na pūchh
jo sar jhukā ke kūcha-e-qātil meñ rah gayā

qātil ne teġh myaan meñ kuchh soch kar rakhī
thoḌā sā jab ki dam tan-e-bismil meñ rah gayā

aqlīm-e-dil pe ishq kī farmāñ-ravā.iyāñ
jāñ-baḳhsh qurbateñ kahīñ qātil judā.iyāñ

qātil kā mil sakā na bhare shahr meñ surāġh
har chand merā ḳhuun thā phailā shafaq shafaq

'faiz' kyā jāniye yaar kis aas par muntazir haiñ ki lā.egā koī ḳhabar
mai-kashoñ par huā mohtasib mehrbāñ dil-figāroñ pe qātil ko pyaar aa gayā

ho gayā dahshat se aisā bismiloñ kā ḳhuun ḳhushk
ek bhī dhabbā lahū kā teġh-e-qātil meñ nahīñ

Dūbte jaate haiñ kyūñkar log hairat hai mujhe
qadd-e-ādam aab bahr-e-teġh-e-qātil meñ nahīñ

ḳhūn-e-nāhaq kā hamāre daaġh miTne kā nahīñ
teġh meñ hogā agar dāmān-e-qātil meñ nahīñ

jise tum ne kahā thā samm-e-qātil
azīzam asl meñ tiryāq hai vo

jis ke har daane se ik qatra-e-ḳhūñ Tapke hai
hai mañDhī myaan pe qātil ke ajab haal kī khaal

āsmāñ jis ko log kahte haiñ
koī qātil kī ho zamīñ na kahīñ

haiñ jo vo kushta-e-shamshīr nigāh-e-qātil
jā ke un ganj-e-shahīdāñ se kaho ishq allāh

jab uThā ḳhanjar na us se is adā par mar ga.e
ham se bhī goyā na bār-e-minnat-e-qātil uThā