Tags-Qatil

aaj phir maqtal meñ qātil kah rahā hai baar baar
aa.eñ vo shauq-e-shahādat jin ke jin ke dil meñ hai

sarfaroshī kī tamannā ab hamāre dil meñ hai
dekhnā hai zor kitnā bāzū-e-qātil meñ hai

na kī kis ne sifārish merī vaqt-e-qatl qātil se
kamāñ ne haath joḌe teġh ne qadmoñ pe sar rakkhā

pahchān lo us ko vahī qātil hai hamārā
jis haath meñ TuuTī huī talvār lage hai

mo.ajiza ye bhī dikhāyā maiñ ne
apne qātil ko rulāyā maiñ ne

apne hī maqtūl Thahre apne hī qātil bane
apne hī hāthoñ se ham kashtī bhañvar tak le ga.e

qātil kī saarī sāzisheñ nākām hī rahīñ
chehra kuchh aur khil uThā zahrāb gar piyā

kisī bekas ke lahū ke haiñ ye chhīñTe qātil
gul-e-hasrat se jo phūlā chaman-e-dāman hai

'asad' bismil hai kis andāz kā qātil se kahtā hai
ki mashq-e-nāz kar ḳhūn-e-do-ālam merī gardan par

kab ḳhuuñ meñ bharā dāman-e-qātil nahīñ ma.alūm
kis vaqt ye dil ho gayā bismil nahīñ ma.alūm

haiñ ashk zaḳhmoñ se mere jaarī na dekhī hogī ye ashk-bārī
banī haiñ chashm-e-pur-āb qātil ye zaḳhm paanī churā churā kar

vā nahīñ hotā lab-e-shikva sar-e-mahshar 'ra.īs'
apne sar par ḳhanjar-e-qātil kā ehsāñ dekh kar

tanhā.ī kī bojhal rāteñ pahle bhī to barsī thiiñ
zaḳhm nahīñ the itne qātil ġham itnā be-dard na thā

hai vo maqtūl kāfir-e-nemat
apne qātil ko jo duā na kare

sad haif ka.ī log ga.e jaañ se mire saath
qātil ko to matlūb faqat merā hī sar thā

kaun gardāntā use qātil
vo to izzat-ma.āb jaisā thā

phir zarā ḳhanjar-e-qātil ko ḳhabar de koī
ḳhūn-e-'bismil' meñ vahī josh nazar aatā hai

qātil ke sivā koī samajh hī nahīñ saktā
kyā dekhtī haiñ tasht meñ rakkhī huī āñkheñ

qatl ho to merā sā maut ho to merī sī
mere sogvāroñ meñ aaj merā qātil hai