Tags-Qatil

jis kī teġh hai duniyā us kī jis kī lāThī us kī bhaiñs
sab qātil haiñ sab maqtūl haiñ sab mazlūm haiñ zālim sab

ḳhanjar ḳhanjar qātil abrū dilbar haath masīhā hoñT
lahū lahū hai shām-e-tamannā aañsū aañsū sub.h-e-tarab

mujh se nikal ke jā.egā qātil mirā kahāñ
ik din to mere sāmne mahshar meñ aa.egā

mere jism ke andar hī
shāyad merā qātil thā

kuchh muzd-e-rañj bāzū-e-qātil nahīñ ki dil
nazr adā-e-burrash-e-shamshīr kar chuke

log gūñge haiñ bayābāñ meñ azaañ kaise ho
log qātil haiñ ilāj-e-ġham-e-jāñ kaise ho

maqtal-e-shauq ke ādāb nirāle haiñ bahut
dil bhī qātil ko diyā karte haiñ sar se pahle

'mehr' vallāh maiñ qātil huuñ tirī bātoñ kā
ḳhuub andāz-e-suḳhan hai tirā sīdhā sīdhā

sar teġh tale us ke to dhar dījiye kyūñkar
qātil jo vahī hai to nigahbān vahī hai

ye nahīñ sochte qātil bhī to ho sakte haiñ
chāñd ke bhes meñ tārīk se bad-tar chehre

diyat is qātil-e-be-rahm se kyā lījiyegā
apnī hī āñkhoñ se ab ḳhuun bahā lījiyegā

apnā jiinā marnā kyā
qātil mere ḳhabar meñ rah

kare koī teġh kā nazārā ab un ko ye bhī nahīñ gavārā
ba-zid hai qātil ki jān-e-bismil figār ho jism o tan se pahle

zab.h ham sāmne hote hī hue qātil ke
bāvajūde-ki koī haath meñ hathiyār na thā

kaun sā rāhat-rasāñ ma.ashūq hai āfāq meñ
dūsrā bhī āfat-e-jāñ hai jo qātil ek hai

muddatoñ se sīna-e-bismil hai jis qātil kā ghar
kyā huā dil meñ agar aaj us kā ḳhanjar rah gayā

tujh se qātil kah diyā thā dil kā ye armān hai
dekh le āḳhir mire siine meñ ḳhanjar rah gayā

teġh to ochhī paḌī thī gir paḌe ham aap se
dil ko qātil ke baḌhānā koī ham se siikh jaa.e

dekh kar qātil ko bhar laa.e ḳharāsh-e-dil meñ ḳhuuñ
sach to ye hai muskurānā koī ham se siikh jaa.e

thī magar itnī na thī kor zamāne kī nazar
ek qātil pe masīhā kā gumāñ hai ab ke