Tags-Qatil

shahr ke aa.iin meñ ye mad bhī likkhī jā.egī
zinda rahnā hai to qātil kī sifārish chāhiye

ab subuk-dosh maiñ huuñ bojh gale kā Tal jaa.e
teġh-e-qātil se ilāhī kaheñ be-sar maiñ huuñ

baaḌh dī bāñkī adāoñ ne jo ḳhanjar ko 'jalīl'
zab.h karne meñ mire qātil ko āsānī huī

mere hone meñ kisī taur se shāmil ho jaao
tum masīhā nahīñ hote ho to qātil ho jaao

sitam bhī ho to mujh par ho jafā bhī ho to mujh par ho
mujhe is rashk ne maarā vo kyuuñ aalam kā qātil hai

zahe taqdīr kis ārām o rāhat se vo bismil hai
ki jis ke sar kā takiya der se zānū-e-qātil hai

qarīne se ajab ārāsta qātil kī mahfil hai
jahāñ sar chāhiye sar hai jahāñ dil chāhiye dil hai

tire shahīd ke jeb-e-kafan meñ ai qātil
gulāl se bhī hai rañg-e-abīr laal huā

kise ḳhabar hai ki ham donoñ apne qātil haiñ
jo be-ḳhabar haiñ unheñ chīḳh kar batāne de

qātil pe jo sar ko vaar aa.e
bār-e-tan-e-zār utaar aa.e

ab zabāñ ḳhanjar-e-qātil kī sanā kartī hai
ham vahī karte haiñ jo ḳhalq-e-ḳhudā kartī hai

ye baat sach hai ki marnā sabhī ko hai lekin
alag hī hotī hai lazzat nigāh-e-qātil kī

ab āñkheñ band haiñ taaki koī samajh na sake
mirī nigāh meñ tasvīr hogī qātil kī

lazzat-e-qatl kyā kahūñ qātil
chāTtī hai lahū chhurī merā

maiñ saḳht-jāñ nahīñ ḳhanjar bhī tez hai lekin
nigāh-e-yās hai qātil kī tez-dastī hai

ḳhudā jaane kis kis kī ye jaan legī
vo qātil adā vo qazā mahkī mahkī

yahīñ se sair kar lo 'yās' itnī duur kyuuñ jaao
adam ābād kar DāñDā milā hai kū-e-qātil se

liye halqe meñ hoñ sab ahl-e-mahshar
kamar meñ haath ho qātil ho ham huuñ

āsmāñ ne mujhe mahrūm-e-shahādat rakkhā
teġh-e-qātil ke liye baḳht-e-siyah-e-Dhāl huā

ye sach hai chand lamhoñ ke liye bismil taḌaptā hai
phir is ke ba.ad saarī zindagī qātil taḌaptā hai