Tags-Qatil

naujavāñ qātil ko achchhī dil-lagī haath aa ga.ī
jab talak kuchh dam rahā bismil ko Thukrātā rahā

kitnā vo qātil hai be-ḳhauf-o-ḳhatar
teġh-e-ḳhūñ-ālūda dhotā hī nahīñ

mirā ḳhūn-e-tamannā hai hinā-band-e-kaf-e-qātil
junūn-e-shauq kaam aayā farāz-e-dār kā halqa

ham chale haiñ kūcha-e-qātil ko ye soche baġhair
tum na aao saath tab bhī qāfila ho jā.egā

sochiye āḳhir vo kyā hālāt haiñ
jā rahe haiñ kūcha-e-qātil meñ ham

zab.h mujh ko anīle-pan ne kiyā
qatl qātil ko kar nahīñ aatā

dil milne pe bhī pahlū na milā dushman to baġhal hī meñ hai chhupā
qātil hai mohabbat kī ye hayā tum aur kahīñ ham aur kahīñ

zindagī ḳhud bhī tujhe marnā paḌegā varna
mere qātil ko kabhī bhī na samajh pā.egī

itnā qātil bhī nahīñ husn tirā hosh meñ rah
in chhichhoroñ ne to be-par kī uḌā rakkhī hai

mumkin hai dast-o-bāzū-e-qātil to thak bhī jaa.e
shāyad thame na dīda-e-ḳhūñbār ab koī

ishq-bāzoñ ke haq meñ qātil kī
har nigah ḳhanjar o kaTārī hai

taḌaptā huuñ bujhā de pyaas merī āb-e-ḳhanjar se
ki mere dil se ai qātil tire haq meñ duā nikle

'vāris' ye shā.irī sam-e-qātil se kam nahīñ
aap is balā-e-jāñ se ḳhabar-dār kyuuñ na the

ye aañsū kasm-pursī kis ke mātam meñ bahātī hai
janāza aaj kis kā kūcha-e-qātil se uThtā hai

kahāñ ḳhanjar bhī dast-e-nāvak-e-qātil se uThtā hai
nazākat se hinā kā baar bhī mushkil se uThtā hai

ḳhudāyā yuuñ bhī ho ki us ke hāthoñ qatl ho jā.ūñ
vahī ik aisā qātil hai jo pesha-var nahīñ lagtā

patā qāsid ye rakhnā yaad us qātil ke kūche se
koī nālāñ koī bismil koī be-dam nikaltā hai

sunā hai zaḳhmi-e-teġh-e-nigah kā dam nikaltā hai
tirā armān le ai qātil-e-ālam nikaltā hai

mujhe sab dekh kar hairān kyuuñ haiñ
maiñ qātil huuñ koī yā devtā huuñ

mirī mazlūmiyat kī raushnī har-sū bikharne de
sar-e-maqtal maiñ pesh-e-teġh-e-qātil ho hī jā.ūñgā