Tags-Raasta

zauq-e-azm-e-bā-amal darkār hai
aag meñ bhī rāsta ho jā.egā

us ne yuuñ rāsta diyā mujh ko
rāste se haTā diyā mujh ko

ik purānā rāsta ab kis tarah DhūñDe koī
shahr bhar ke sab galī-kūche hoñ jab badle hue

dasht meñ jo bhī hai jaisā mirā dekhā huā hai
rāsta us ke safar kā mirā dekhā huā hai

manzil mire nasīb meñ likh dī ga.ī magar
pur-pech rāsta mujhe dikhlā diyā gayā

jo raste meñ akelā rah gayā thā
vo sab ko rāsta dikhlā rahā hai

jannat-e-arzī bulātī hai tumheñ
aao 'sarvat' rāsta maujūd hai

rāsta de ki mohabbat meñ badan shāmil hai
maiñ faqat ruuh nahīñ huuñ mujhe halkā na samajh

safar qadmoñ se vābasta hai lekin rāsta apnā
gulistānoñ se vābasta na vīrānoñ se vābasta

shaam hote hī nikal aate haiñ taare 'fāḳhir'
ik sitāre kā magar rāsta shab-bhar dekheñ

do āñkheñ ab bhī dekhtī haiñ rāsta tirā
jā kar kabhī salām duā kah liyā karo

ris rahā hai muddat se koī pahlā ġham mujh meñ
rāsta banātā hai āñsuoñ kā nam mujh meñ

ḳhabar to detā mujhe mujh ko chhoḌ jaane kī
maiñ vāpsī kā tujhe rāsta batā detā

vāraftagī mirī hai ki hai intihā-e-shauq
us kī galī ko le gayā har rāsta mujhe

is shauq-e-farāvāñ kī yārab āḳhir koī had bhī hai ki nahīñ
inkār kareñ vo yā va.ada ham rāsta dekhte rahte haiñ

aap kī suhūlat bas ham aziiz rakhte haiñ
maañg lo atā hogā rāsta bichhaḌne kā

darvāza koī ghar se nikalne ke liye de
be-ḳhauf koī rāsta chalne ke liye de

qadam qadam pe jalātā chalūñgā dil ke charāġh
jo rāsta hai añdherā to mere saath chalo

har ghar ke rāste meñ nadī aa khaḌī huī
har rāsta na jaane kahāñ jā ke kho gayā

manzilo tum hī kuchh aage kī taraf baḌh jaao
rāsta kam hai mire paañv ko chalne ke liye