Tags-Raasta

ta.alluqāt ke tāvīz bhī gale meñ nahīñ
malāl dekhne aayā hai rāsta kaise

raat ke jañgal meñ maiñ huuñ aur tirī mub.ham sī yaad
ik diyā hai ye kahāñ tak rāsta raushan kare

manzil nahīñ huuñ ḳhizr nahīñ rāhzan nahīñ
manzil kā rāsta huuñ mujhe yaad kījiye

qadam hazār jihat-āshnā sahī lekin
guzar gayā huuñ jidhar se vo rāsta bhī nahīñ

baat hai rāste pe jaane kī
aur jaane kā rāsta hī nahīñ

hadeñ vafā kī bhī āḳhir havas se miltī haiñ
ye rāsta bhī idhar se udhar ko jaatā hai

hamvār rāstoñ pe mirā saath chhoḌ kar
aage nikal gayā thā to ab rāsta bhī dekh

yahāñ se guzre haiñ guzreñge ham se ahl-e-vafā
ye rāsta nahīñ parchhā.iyoñ ke chalne kā

rāsta kis ke paañv se uljhe
khūñTiyoñ par Tañge hue haiñ log

kis tarah rokoge ashkoñ ko pas-e-dīvār-e-chashm
ye to paanī hai ise to rāsta mil jā.egā

mirā rāsta tire rāste se alag huā
yahī rāsta thā bachā huā mire sāmne

achchhā huā ki gosha-nashīnī kī iḳhtiyār
'āshufta' aur is ke sivā rāsta na thā

rāsta sach kā hai kaThin pyāre
har qadam imtihān hotā hai

vo aadhī raat vo sunsān rāsta vo makāñ
vo ik sham.a sī jaltī huī darīche meñ

guzar ke jaanā hai vahshat ke ek dariyā se
yaqīñ na ho to yahāñ rāsta kahāñ dekho

na aisī manzileñ hotīñ na aisā rāsta hotā
sambhal kar ham zarā chalte to aalam zer-e-pā hotā

sūfiyoñ buzurgoñ ne naqsh-e-pā jo chhoḌe the sab miTā diye tū ne
vaqt ke darinde ab kusht-o-ḳhūn kā ik ik rāsta mubārak ho

koī māyūsiyoñ ko samjhā.e
chaah ḳhud rāsta banātī hai

rāh-e-ulfat meñ kahāñ āsāniyāñ
pur-ḳhatar ye rāsta hai mustaqil

janāb-e-ḳhizr rāh-e-ishq meñ laḌne se kyā hāsil
maiñ apnā rāsta le luuñ tum apnā rāsta le lo