Tags-Raasta

badlegā ruḳh havā kabhī to
khul jā.egā rāsta kabhī to

pīchhe muḌne meñ ḳhauf-e-rusvā.ī
aage jaane kā rāsta bhī nahīñ

palaT paḌā jo maiñ sar phoḌ kar mohabbat meñ
to rāsta isī dīvār se nikal aayā

bas ek moḌ kyā kaTā ki vāpsī kā rāsta hī kho gayā
maiñ DhūñD DhūñD thak gayā yahīñ to thī mirī galī kidhar ga.ī

yaqīñ kā rāsta tai karne vaale
bahut tezī se vāpas aa rahe haiñ

rishta hotā hai yā nahīñ hotā
beach kā rāsta nahīñ hotā

ye naġhma-e-kā.enāt kī be-surī sadā.eñ haiñ
koī in se najāt kā rāsta batāo

rāsta pur-ḳhār dillī duur hai
sach kahā hai yaar dillī duur hai

tujh se milne kā rāsta bas ek
aur bichhaḌne ke rāste haiñ bahut

aañkh rakkhī huī hai aahaT par
rāsta kaan ko lagāyā huā

maiñ ne kitnī baar pūchhā tere ghar kā rāsta
zindagī kā mas.ala jis vaqt zer-e-ġhaur thā

jo rukāvaT thī hamārī raah kī
rāsta niklā usī dīvār se

ik safar phir marī taqdīr huā jaatā hai
rāsta paañv kī zanjīr huā jaatā hai

ye jo mujh ko girā diyā gayā hai
aap ko rāsta diyā gayā hai

añdherī raat meñ jab rāsta nahīñ miltā
maiñ sochtā huuñ kahāñ jā ke DhūñD lā.ūñ use

kyā zarūrī hai añdhere meñ tirā tanhā safar
jis pe chalnā hai tujhe vo rāsta merā bhī hai

har rāsta kahīñ na kahīñ muḌ hī jā.egā
rishtoñ ke biich thoḌā bahut fāsla bhī rakh

jin āñkhoñ ne hamārī āñkhoñ aur paañv ke liye rāsta banāyā
vo an-dekhe āsmān kī taraf chalī ga.iiñ

hijr ne kaun sā paivand lagā rakkhā thā
rāsta mil gayā ḳhanjar ko guzar jaane kā

tañg hai sehn-e-jahāñ saath na le bār-e-amal
rāsta miltā hai mushkil se guzar jaane kā