Tags-Raasta

maiñ roz ek zamāne kī sair kartā huuñ
ye rāsta mire bistar se ho ke jaatā hai

tamām-umr chalā huuñ magar chalā na gayā
tirī galī kī taraf koī rāsta na gayā

zamīnoñ par na yuuñ qabza kareñ shahar
koī to rāsta sahrā kā rah jaa.e

chale ho mai-kasho piine magar tum hosh mat khonā
kisī ko rāsta ghar kā ye maiḳhāne nahīñ dete

bas ye safar hayāt kā itnī sī zindagī
kyuuñ itnī jaldī rāsta saarā guzar gayā

jaane vāloñ ke liye tū aur kyā le jā.egā
dekh le duniyā jahāñ tak rāsta le jā.egā

ġhanīmat jaan tū do pal bhī 'rāhī'
vafā kā rāsta lambā nahīñ hai

be-ḳhud-e-shauq huuñ aatā hai ḳhudā yaad mujhe
rāsta bhuul ke baiThā huuñ sanam-ḳhāne kā

ḳhud apnā rāsta hī kho diyā hai
safar meñ gard paañv se uḌā kar

uḌā ga.e haiñ bahut dhuul jaane vaale log
chhaTe ġhubār to kuchh rāsta nazar aa.e

ham qāfile se bichhḌe hue haiñ magar 'nabīl'
ik rāsta alag se nikāle hue to haiñ

mirā rāsta kārvāñ se alag hai
guzarnā hai ik manzil-e-pur-ḳhatar se

maiñ band āñkhoñ ke ā.inoñ meñ tumhārī aamad kī muntazir huuñ
chale bhī aao mirī mohabbat kā rāsta pur-ḳhatar nahīñ hai

shahr-e-nā-pursāñ meñ kuchh apnā pata miltā nahīñ
bām-o-dar raushan haiñ lekin rāsta miltā nahīñ

kis musībat se yahāñ tak tire saath aa.e the
rāsta tujh se alag ho ke kaTegā kaise

ḳhud-baḳhud rāsta degā ye zamāna 'tālib'
dostī ke liye vo haath baḌhā.e to sahī

hamāre vāste jis jā pe hadd-e-fāsil hai
vahīñ se ek nayā rāsta nikaltā hai

pusht par qātil kā ḳhanjar sāmne andhā kuaañ
bach ke jā.ūñ kis taraf ab rāsta koī nahīñ

go chal paḌā huuñ dil se magar chāhtā huuñ ye
uTh kar mujhe vo rok le aur rāsta na de

paanī ne rāsta na diyā jān-būjh kar
ġhote lagā.e phir bhī rahe tishna-kām se