Tags-Raat

us ne sūraj se chaar kiiñ āñkheñ
jis ne manzar thā raat kā dekhā

har shikan phuuT phuuT kar roī
raat phir ḳhvāb-e-karbalā dekhā

guzishta raat koī chāñd ghar meñ utrā thā
vo ek ḳhvāb thā yā bas nazar kā dhokā thā

kārvāñ luT gayā rāhbar chhuT gayā raat tārīk hai ġham kā yaarā nahīñ
raah meñ bhī koī sham.a jaltī nahīñ āsmāñ par bhī koī sitārā nahīñ

is se baḌh kar koī aur kaise jiye umr-bhar ham ne ik bevafā ke liye
kaun sī raat āñkhoñ meñ kaaTī nahīñ kaun sā din taḌap kar guzārā nahīñ

khīñch kar is māh-rū ko aaj yaañ laa.ī hai raat
ye ḳhudā ne muddatoñ meñ ham ko dikhlā.ī hai raat

chāñdnī hai raat hai ḳhalvat hai sehn-e-bāġh hai
jaam bhar saaqī ki ye qismat se haath aa.ī hai raat

be-hijāb aur be-takalluf ho ke milne ke liye
vo to Thahrāte the din par ham ne Thahrā.ī hai raat

jab maiñ kahtā huuñ kisī shab ko to kāfir yaañ bhī aa
hañs ke kahtā hai miyāñ haañ vo bhī banvā.ī hai raat

kyā maza ho haath meñ zulfeñ hoñ aur yuuñ pūchhiye
ai mirī jaañ sach kaho to kitnī ab aa.ī hai raat

jab nashe kī lahr meñ baal us parī ke khul ga.e
sub.h tak phir to chaman meñ kyā hī lahrā.ī hai raat

daur meñ husn-e-bayāñ ke ham ne dekhā bār-hā
ruḳh se ghabrāyā hai din zulfoñ se ghabrā.ī hai raat

hai shab-e-vasl aaj to dil bhar ke sovegā 'nazīr'
us ne ye kitne dinoñ meñ aish kī paa.ī hai raat

muntazir thā tirā dīvāna-e-gesū jis raat
ālam-e-chashm har ik halqa-e-zanjīr meñ thā

raat maiñ is kashmakash meñ ek pal soyā nahīñ
kal maiñ jab jaane lagā to us ne kyuuñ rokā nahīñ

sub.h ke Dar se aañkh lag na sakī
raat bhar karvaTeñ badalte rahe

din añdheroñ kī talab meñ guzrā
raat ko sham.a jalā dī ham ne

raat ke māthe pe sūraj ne sahar likh dī hai
aasrā us se mulāqāt kā bhī TuuT gayā

rasta roktī ḳhāmoshī ne kaun sī baat sunānī hai
raat kī āñkheñ jaan rahī haiñ kis ke paas kahānī hai

raat kī chādar tah hone tak dhuup kā jaadū khulne tak
darvāze ke band kivāḌoñ se ik baat chhupānī hai