Tags-Raat

jab tujhe yaad kar liyā sub.h mahak mahak uThī
jab tirā ġham jagā liyā raat machal machal ga.ī

hijr kī raat ye har Dūbte taare ne kahā
ham na kahte the na ā.eñge vo aa.e to nahīñ

'saudā' tirī fariyād se āñkhoñ meñ kaTī raat
aa.ī hai sahar hone ko Tuk tū kahīñ mar bhī

chhup jaatā hai phir sūraj jis vaqt nikaltā hai
koī in āñkhoñ meñ saarī raat Tahaltā hai

din meñ dhūpeñ ban kar jaane kaun sulagtā thā
raat meñ shabnam ban kar jaane kaun pighaltā hai

raat ugaltā rahtā hai vo ek baḌā saaya
chhoTe chhoTe saa.e jo har shaam nigaltā hai

'hasrat' tirī nigāh-e-mohabbat ko kyā kahūñ
mahfil meñ raat un se sharārat na ho sakī

hamāre gaañv meñ sūraj ġhurūb ho ki na ho
kisī ke aañkh lagāne se raat hotī hai

vaqt kī guzrī ibārat kī tilāvat ke liye
raat kī tanhā.iyoñ meñ aao ghūmeñ sub.h tak

jo raat ko apne saath liye aa.e the shahr kī galiyoñ meñ
ab nuur ke taḌke sub.hoñ ke āsār kī bāteñ karte haiñ

duur jā niklā kahīñ sūraj hamāre shahr kā
raat bhāgī aa rahī hai shaam ke saa.e hue

jāgtā huuñ maiñ ek akelā duniyā sotī hai
kitnī vahshat hijr kī lambī raat meñ hotī hai

din to jaise-taise kaT hī jaatā hai
raat ko uTh uTh taare ginñe lagte haiñ

jab dil kī vafāt ho ga.ī hai
har chiiz kī raat ho ga.ī hai

ab ho mujhe dekhiye kahāñ sub.h
un zulfoñ meñ raat ho ga.ī hai

is daur meñ zindagī bashar kī
bīmār kī raat ho ga.ī hai

vo chāheñ to vaqt bhī badal jaa.e
jab aa.e haiñ raat ho ga.ī hai

ikkā-dukkā sadā-e-zanjīr
zindāñ meñ raat ho ga.ī hai

Dar jaanā hai dasht-o-jabal ne tanhā.ī kī haibat se
aadhī raat ko jab mahtāb ne tārīkī se ubharnā hai

yaad meñ kis kī raat royā huuñ
ġharq-e-ḳhūñ hai hanūz jeb-o-kanār