Tags-Raat

raat bhar hotī haiñ kyā kyā anjuman-ārā.iyāñ
sham.a kā koī sharīk-e-sub.h-e-ġham hotā nahīñ

tez-tar havā.eñ haiñ maut kī fazā.eñ haiñ raat sard o jāmid hai
ahmarīñ sitāre bhī vāqa.ī divāne haiñ ab bhī muskurāte haiñ

raat aa.ī hai bahut rātoñ ke ba.ad aa.ī hai
der se duur se aa.ī hai magar aa.ī hai

aaj kī raat bahut rātoñ ke ba.ad aa.ī hai
kitnī farḳhanda hai shab kitnī mubārak hai sahar

phuul ke chehre ye shabnam kaisī
āsmāñ raat meñ royā hogā

vasl kā biij bo nahīñ paayā
raat zinda thā so nahīñ paayā

maiñ tumhārā rahā raat bhar
kasmasātā rahā raat bhar

tum ne dil ko jalāyā bahut
maiñ bujhātā rahā raat bhar

zaḳhm ubhre the tan par magar
maiñ chhupātā rahā raat bhar

jis ke aane kī ummīd thī
vo satātā rahā raat bhar

bas tumheñ bhūlne ke liye
ḳhat jalātā rahā raat bhar

tum se milnā bahut hai kaThin
so bhulātā rahā raat bhar

ḳhair-maqdam ko tere diyā
jagmagātā rahā raat bhar

ashk paanī nahīñ the magar
maiñ bahātā rahā raat bhar

dil meñ thā ek pakshī tirā
chhaTpaTātā rahā raat bhar

vo mujhe chāhtā thā bahut
maiñ banātā rahā raat bhar

maiñ hī huuñ terā ik ham-safar
ye jatātā rahā raat bhar

bas tujhe dekhne ke liye
kasmasātā rahā raat bhar

jis pe ham ko bahut thā yaqīñ
vo rulātā rahā raat bhar

ye to 'ādarsh' bhī na huā
kaun aatā rahā raat bhar