Tags-Raat

rahtī huuñ terī yaad meñ mad.hosh raat din
tere surūr-o-kaif ne maḳhmūr kar diyā

malba tumhārī yaad kā Dhoyā hai raat din
nāzuk sī ek laḌkī ko mazdūr kar diyā

raat aur raat meñ gūñjtī ek baat
ek ḳhauf, ik muñDer, ik diyā aur maiñ

yaar hamārī baat na pūchh
kaise biitī raat na pūchh

kabhī tire ġham meñ mujh ko ronā kabhī phir aaphī hai chupke honā
jo yaad aatā hai saath sonā to raat kaTtī hai kis fuġhāñ se

kaalī āñkhoñ meñ shahābī karvaTeñ
koī ḳhvāhish raat meñ bedār sī

raat ik hādsa huā mujh meñ
ek darvāza sā khulā mujh meñ

ma.asūm sitamgar kī bāteñ mazlūm adā ke afsāne
yuuñ raat basar ho jaatī hai yuuñ dil kā mudāvā karte haiñ

ai raat ke añdhiyāre meñ jaage hue lamho
DhūñDo use vo ḳhvāb-e-pareshāñ kī tarah thā

jaise muñh-band kalī raat ke vīrāne meñ
saañs lenā mujhe dushvār huā jaatā hai

ai 'valī' ġhairat suuñ sūraj kyuuñ jale na.iiñ rāt-din
jag munīñ vo maah rashk-e-māh-e-kan.ānī huā

'naushād' raat kaisī thī vo mahfil-e-tarab
lagtī thī dil pe choT sī table kī thaap se

phail ga.ī bāloñ meñ sapedī chauñk zarā karvaT to badal
shaam se ġhāfil sone vaale dekh to kitnī raat rahī

maiñ aadmī kā ta.āqub bhalā karūñ kaise
maiñ rāt-din yuuñ hī paidal chalā karūñ kaise

yādoñ kī sīḌhī se 'nāsir'
raat ik saayā sā utrā thā

raat ke afsūñ jagāte hī rahe
niiñd apnī dāstāñ se aa.ī hai

koī hañgāma-e-hayāt nahīñ
raat ḳhāmosh hai sahar ḳhāmosh

aas kā sūraj to saarī zindagī niklā magar
din ke andar jaane kaise raat baaqī rah ga.ī

lajā kar raat ne kuchh aur bhī ghuñghaT nikālā
talab ne jism pahnā shauq ne gahne utāre

hamārī jiit huī hai ki donoñ haare haiñ
bichhaḌ ke ham ne ka.ī raat din guzāre haiñ