Tags-Raat

na jaane kab tujhe jañgal meñ raat paḌ jaa.e
ḳhud apnī aag se sho.ala koī ujaal ke rakh

is daur meñ zindagī bashar kī
bīmār kī raat ho ga.ī hai

lashkar-e-ġham kī kishvar-e-dil par
raat din ab chaḌhā.ī hotī hai

vo raat bhar charāġh kī lau dekhtā rahā
imkāñ tarāshtā hai jo apne gumān se

din-rāt mirī chhātī jaltī hai mohabbat meñ
kyā aur na thī jaagā ye aag jo yaañ daabī

bas andhere ne rañg badlā hai
din nahīñ hai safed raat hai ye

zindagī kī āñkhoñ meñ rāt-din khaTakte haiñ
ḳhas jo haiñ to lā-sānī ḳhaar haiñ to chīda ham

luuT lī zulmat ne rū-e-hind kī tābindagī
raat ke kāñdhe pe sar rakh kar sitāre so ga.e

jab raat ga.e tirī yaad aa.ī sau tarah se jī ko bahlāyā
kabhī apne hī dil se bāteñ kiiñ kabhī terī yaad ko samjhāyā

suhānī raat meñ dilkash nazāre yaad aate haiñ
nahīñ ho tum magar vo chāñd taare yaad aate haiñ

nigāhoñ meñ abhī tak hai usī din raat kā manzar
tumhāre saath meñ biite hue lamhāt kā manzar

kal raat kuchh ajiib samāñ ġham-kade meñ thā
maiñ jis ko DhūñDhtā thā mire aa.ine meñ thā

rahgīr sun rahe the ye kis jashn-e-nau kā shor
kal raat merā zikr ye kis silsile meñ thā

ik raat chāñdnī mire bistar pe aa.ī thī
maiñ ne tarāsh kar tirā chehra banā diyā

ye raat hai nārāz jo dekhā ki havā se
do ek charāġhoñ ko bujhāyā na gayā hai

vo biit hī ga.ī jo amāvas kī raat thī
phailī hai mere chāroñ taraf chāñdnī abhī

hashr meñ le ke chalo mutrib o ma.ashūq o subū
ġhair ke ghar meñ kabhī raat bhī ho jaatī hai

din raat mai-kade meñ guzartī thī zindagī
'aḳhtar' vo be-ḳhudī ke zamāne kidhar ga.e

din huā kaT kar girā maiñ raushnī kī dhaar se
ḳhalq ne dekhe lahū meñ raat ke anvār se

sochtī huuñ kī jald din nikle
raat itnī lage baḌī tanhā