Tags-Raat

gungunātī sī koī raat bhī aa jaatī hai
aap aate haiñ to barsāt bhī aa jaatī hai

jo tirī yaad meñ har raat bapā hotī hai
aisī mahfil ko 'sahar' bazm-e-azā kahte haiñ

raat hai shahr-e-butāñ hai aur ham
ārzū-e-be-karāñ hai aur ham

raat kī Dhaltī javānī ke rafīq
sirf ik pīr-e-muġhāñ hai aur ham

raat thī aur koī saath na thā
chāñd bhī duur khaḌā hañstā thā

kahāñ kisī ko thī fursat fuzūl bātoñ kī
tamām raat vahāñ zikr bas tumhārā thā

jo sotī to din raat sotī thī vo
jo rotī to din raat rotī thī vo

baat sūraj kī koī aaj banī hai ki nahīñ
vo jo ik raat musalsal thī kaTī hai ki nahīñ

kyuuñ tham tham kar qadam rakho ho kyuuñ itnā ghabrāo ho
raat kā sannāTā hai maiñ huuñ tum kis se sharmāo ho

shaam nahīñ Dhaltī kisī sūrat raat nahīñ kaTtī kisī taur
ab to bahut dil ghabrā.e hai ab to bahut yaad aao ho

din raat zamīn kī gardish par sur-tāl biThāte rahte ho
kabhī ḳhud ko bhī hairān karo kabhī dil kī baat sunā ke suno

ghar mujhe raat bhar Darā.e gayā
maiñ diyā ban ke jhilmilā.e gayā

kis se pūchhūñ ki raat kyā guzrī
ahl-e-bazm apne hosh hī meñ nahīñ

dil kisī ke ḳhayāl meñ hai gum
raat ko ḳhvāb kī paḌī huī hai

har ik raat kī hotī to hai sahar lekin
hamārī raat ko arsa huā sahar na milī

chhup ke aa.egā koī husn-e-taḳhyyul kī tarah
aaj kī raat charāġhoñ ko jalānā hai manā

jo ham ko bhuul ga.e un ko yaad kyuuñ kiije
tamām raat koī chupke chupke kahtā hai

jalva-e-māhtāb bhī sho.abada-e-ḳhayāl hai
raat ke paas kuchh nahīñ sub.h kā intizār kar

ThanDī raat meñ aag jalā kar
merā rasta taktā hogā

din nikal aayā āñgan meñ
raat ga.e jab aayā vo