Tags-Raat

shaiḳh jo hai masjid meñ nañgā raat ko thā mai-ḳhāne meñ
jubba ḳhirqa kurtā Topī mastī meñ in.aam kiyā

yaañ ke sapīd o siyah meñ ham ko daḳhl jo hai so itnā hai
raat ko ro ro sub.h kiyā yā din ko juuñ tuuñ shaam kiyā

raat pahlū meñ so ga.ī mere
raat ko chain aa gayā hogā

phuul laale kā khilā thā ki shafaq shaam kī thī
vasl kī raat ko bhī rañg badalte dekhā

kabhī kuchh raat ga.e yā kabhī kuchh raat rahe
ham ne in parda-nashīnoñ ko nikalte dekhā

aage mere na sheḳhī maar ai shaiḳh
raat kā mājrā sunā dūñgā

tere bin raat ke hāthoñ pe ye tāroñ ke ayāġh
ḳhūb-sūrat haiñ magar zahr ke pyāloñ kī tarah

dil ko kyā jaane kyā huā 'sālik'
chain kyuuñ rāt-bhar nahīñ aatā

vo kahā karte haiñ koThoñ chaḌhī hoñToñ niklī
dil meñ hī rakhnā jo kal raat huā koThe par

sarā-e-dil meñ jagah de to kaaT luuñ ik raat
nahīñ ye shart ki mujh ko sharīk-e-ḳhvāb banā

zulfoñ kī syāhī meñ ajab husn-e-nihāñ hai
ye raat usī husn kā saayā to nahīñ hai

mujh pe TuuTī jo siyah-rāt batāne kī nahīñ
ya.anī ye gardish-e-hālāt batāne kī nahīñ

maiñ kahānī ko na.e lafz-o-ma.ānī dūñgī
ḳhud pe guzrī huī din-rāt batāne kī nahīñ

sāvan kī rut bahār kā mausam añdherī raat
rim-jhim ke giit guuñj rahe haiñ phuvār meñ

jahāñ āsāñ thā din ko raat karnā
vo galiyāñ ho ga.ī haiñ ek sapnā

maiñ ne din raat ḳhudā se ye duā māñgī thī
koī aahaT na ho dar par mire jab tū aa.e

vo tilismī raat abhī talak mire jism o jaañ pe muhīt hai
vo jo raat utrī thī arsh se tire jāduoñ meñ bharī huī

sūraj kī barchhiyoñ se mirā jism chhid gayā
zaḳhmoñ kī sūliyoñ pe mirī raat kaT ga.ī

añdherī raat kī gahrī ḳhamoshī aur tanhā dil
diye kī lau bhī maddham hai kabhī milne chale aao

phir maujoñ se chīḳh sī uTThī mujh ko to ye dhokā hai
ga.ī raat bhī patvāroñ se ḳhuub nibhī mañjdhāroñ kī