Tags-Raat

tere ḳhayāloñ ke parde se jab ġham-e-duniyā jhāñk uThā
ruk ga.ī jaise vaqt kī gardish ho ga.ī dil par bhārī raat

aap na māneñ aap na samjheñ aap pe dil kā zor nahīñ
ham ne apnā dard kahā hai aap se saarī saarī raat

shaam se kaliyāñ dard kī mahkīñ jalte rahe ashkoñ ke charāġh
jaise sabā gulzār se guzre ham ne aise guzārī raat

aane vaalī sub.h ginegī raat ke andhe tūfāñ meñ
kitne sāhil hī par Duube kitne bhañvar ke paar hue

din ke varaq par insāñ kyā the āḌe-tirchhe lafz
raat huī to dekh rahā huuñ kāġhaz par nuqte

bhīgtī jaatī hai raat aur abhī sohbat hai garm
jaam lab-rez isī aalam meñ hamārā hotā

mujhe raat saarī hī tere haañ kaTe kyuuñ ke rote na sham.a saañ
ki ho sake hai kuchh ab bayāñ na ye baat hai ki zabāñ nahīñ

jo roz ham ko ḳhudā banātā to bante roz-e-firāq-e-jānāñ
jo raat ham ko ḳhudā banātā to ham shab-e-intizār hote

jo āsmāñ kī jhiil meñ chamkā tamām raat
vo terā ak-e-naqsh-e-qadam thā qamar na thā

shabnam se tar thā mere sirhāne kā surḳh phuul
lekin abhī to raat kā pichhlā pahar na thā

tulū-e-mehr-e-mubīñ tak nazar nahīñ jaatī
jo be-ḳhabar haiñ vo din ko bhī raat kahte haiñ

garmiyāñ habs raat tārīkī
ik diyā duur TimTimātā hai

raat ai raat sirf raat kī raat
mere pahlū meñ tū rahegī kyā

shor-e-ḳhāmoshī kam nahīñ honā
rāt-bhar hāv-hū rahegī kyā

palkoñ pe niiñd niiñd meñ rakhtā hai ḳhvāb phir
detā hai dastakeñ bhī vahī rāt-bhar mujhe

mil rahā hai sub.h ke taare se jaatā māhtāb
raat ke tārīk ziine se utar jaane ke ba.ad

raat aatī hai to tāqoñ meñ jalāte haiñ charāġh
ḳhvāb zinda haiñ so āñkhoñ meñ jalāte haiñ charāġh

din raat yahāñ putliyoñ kā naach rahe hai
hairat hai ki tū mahv-e-tamāshā nahīñ hotā

shaam hai gahrī tez havā hai sar pe khaḌī hai raat
rasta ga.e musāfir kā ab diyā jalā kar dekh

maand paḌte jā rahe the ḳhvāb-tasvīroñ ke rañg
raat utartī jā rahī thī dard kī dīvār se