Tags-Raat

vo ek shor sā zindāñ meñ raat bhar kyā thā
mujhe ḳhud apne badan meñ kisī kā Dar kyā thā

kis ke mātam meñ ro rahī hai raat
chhup ke bāñhoñ meñ so rahī hai raat

dukh hai Thahrā huā nigāhoñ meñ
terī yādeñ bilo rahī hai raat

mujh ko ḳhvāboñ ke baaġh meñ lā kar
ghane jañgal meñ kho rahī hai raat

raushnī ne lagā.e jo ilzām
bahtī āñkhoñ se dho rahī hai raat

is ko bāñhoñ meñ bhar rahī huuñ maiñ
chāñd ḳhud meñ samo rahī hai raat

vasl kā din tulūa honā hai
maiñ to ḳhush huuñ ki ho rahī hai raat

ai raat ke maaro tumheñ kis tarah bujhā.ūñ
ik sub.h bhī ik din bhī hai is raat se aage

raat kī bhīgī huī dīvār par
maiñ ne ik raushan sitāra rakh diyā

raat tum ne raushnī ke khel meñ
kyuuñ mire saa.e pe saaya rakh diyā

raat abhī aadhī guzrī hai
shahr kī raunaq bujhī nahīñ hai

din-rāt paḌā rahtā huuñ darvāze pe apne
is ġham meñ ki koī kabhī aatā thā idhar se

kuchh to pahle se dil-e-betāb thā vahshī-mizāj
be-tire din raat ghabrātā hai tanhā aur bhī

raat din suntā huuñ tirī aahaT
naqs paidā huā hai kaan meñ kyā

safar hai dushvār ḳhvāb kab tak bahut paḌī manzil-e-adam hai
'nasīm' jaago kamar ko bāñdho uThāo bistar ki raat kam hai

ye misra-e-muḳhbir-e-musībat kamāl ham ko pasand aayā
'nasīm' jaago kamar ko bāñdho uThāo bistar ki raat kam hai

añdhere dauḌte haiñ raat kī vīrān āñkhoñ meñ
charāġhoñ kī jaḌoñ se raushnī kā ḳhuun ristā hai

milā thā hijr ke raste meñ sub.h kī mānind
bichhaḌ gayā thā musāfir se raat hone tak

ḳhushbū ko uḌāne meñ ye raat kī chorī kyuuñ
pūchhe to koī jā kar us raat kī raanī se

dekhiye kab raah par Thiik se uTTheñ qadam
raat kī mai kā ḳhumār dekhiye kab tak rahe