Tags-Raat

phir bāloñ meñ raat huī
phir hāthoñ meñ chāñd khilā

kyā kyā na pyaas jaage mire dil ke dasht meñ
hasrat bhī ek aag hai laage jo raat bhar

bujh gayā raat vo sitārā bhī
haal achchhā nahīñ hamārā bhī

jāgne kā savāl hī na rahā
aaj kī raat niiñd kyā aa.ī

raat ke pichhle pahar niiñd meñ chalte hue log
ḳhuun hote hue mahtāb se Dar jaate haiñ

din ko sotā hai vo na jaane kahāñ
raat ko jāgtā hai māh-e-nau

yaas kī raat kaTī aas kā sūraj chamkā
phir bhī chamke na kisī roz savere dil meñ

lahū-luhān shahīdoñ se sharmsār vo din
vo bībiyoñ ke khule sar kī raat sharminda

vo apnī umr ko pahle piro letā hai Dorī meñ
phir us ke ba.ad gintī umr kī din raat kartā hai

imtihāñ karne ko yuuñ dil se kahā ham ne raat
ai dil-e-ġham-zada is kākul-e-pechāñ se nikal

mileñge daaġh sitāre charāġh-e-shabam bhī
ġhamoñ kī raat kā chehra nikharne vaalā hai

jis ke liye ik umr se lambī kaaTī ham ne kaalī raat
sub.h vo kyuuñ hai shām-ba-dāmāñ maiñ bhī sochūñ tū bhī soch

raat din phirtā hai kyuuñ ai charḳh-e-pīr
tere din haiñ rāhat o ārām ke

vo hoshiyār aadmī ki jāgtā hai raat din
kabhī kabhī use bhī mast-e-ḳhvāb dekhtā huuñ maiñ

yaad kī galiyoñ meñ siina piiT kar
rāt-din tum ko pukārā jā.egā

kal raat muñd ga.ī thiiñ bahutoñ kī āñkheñ ġhash se
dekhā kiyā na kar to sarmast ḳhvāb ho kar

tere paikar ko chhū kar chalī aa.ī hai
marmarīñ hai badan raat kā aaj phir

dekho hamāre sabr kī himmat na TuuT jaa.e
tum raat din satāo magar dil liye hue

ḳhizāñ meñ hijr kī Duubā visāl kā mausam
magar hai zehn meñ ḳhushbū sī raat raanī kī

rāt-rānī sā tū mahaktā hai
merī yādoñ ke sabz album meñ